第一次見到VINTAGE BR AÉRONAVALE嘅設計，就被佢典雅嘅湛藍深深吸引，唔似一般軍錶咁玩粗礦感覺，呢隻錶以海軍飛行員制服做藍本，展現出另一種莊嚴嘅美態。制服使用嘅藍色象徵著海洋；徽章、飾邊、紐扣嘅金色則傳遞出莊重、高貴與榮耀之義。

系列新品主要分成兩大款 : 小三針同計時碼錶 Chronograph。同樣係42mm精鋼錶殼，指針採用鍍金鏤空設計，盤面飾有海軍藍旭日紋，兩種顏色同質料嘅配搭，既能保持精緻嘅感覺，又具有非常出色嘅易讀性。

Chronograph嘅兩個計時盤都飾有蝸形璣鏤刻花紋，同時加設藍色陽極氧化鋁質料嘅60分鐘刻度錶圈。錶面使用藍寶石水晶玻璃，同小三針錶款一樣，內裡都係搭載瑞士製造自動上鏈機芯，確保手錶運行嘅準確度。

錶帶有兩種選擇，肉桂色縫線深藍色小牛皮錶帶，或者帶插針式錶扣嘅午夜藍鱷魚皮錶帶，視乎你想要光亮的精緻感或時尚感重啲嘅緞面紋理。小三針配小牛皮錶帶HK$23,200、配鱷魚皮錶帶HK$24,900；Chronograph配小牛皮錶帶HK$32,700、配鱷魚皮錶帶HK$34,300。