上個年代嘅文學批評，好鐘意講「形式主義」、「結構主義」，其中俄國一名學者什克洛夫斯基(Viktor Shklovsky)就形容，「藝術」係指一個陌生化嘅過程，創作者將一啲大家都好熟悉嘅嘢，用創新嘅方式表現出嚟，令人產生陌生嘅感覺，呢啲就係藝術嘅根源。

Viktor Shklovsky

喂，做乜無啦啦上Comp. Lit堂呀? 因為今次要講嘅Apothic Wines就係應用咗呢個陌生化理論，重新包裝大家飲開嘅葡萄酒。

名字來自「Apotheca」，13世紀歐洲一個神秘嘅釀酒地方，不過Apothic Wines其實係美國加州酒商，用嘅都係加州葡萄，用呢個名只係為咗表達Apotheca嗰陣獨特嘅味道同精神。

釀酒師Debbie Juergenson運用各種葡萄混釀，創造出4款風味迴異嘅系列，Apothic Red、White、Dark、Crush，成為品牌嘅主軸。

以Apothic Dark同 Red為例，前者唔好以為係「黑」葡萄酒，佢一樣係紅酒，只係味道以藍莓、黑莓、咖啡、黑朱古力為主，令人聯想起黑色嘅面貌；而後者Apothic Red 為Zinfandel、Merlot、Shiraz、Cabernet Sauvignon嘅混釀，擁有非常濃厚嘅車厘子、雲尼拿、可可香氣，從血紅色嘅包裝，可見其個性之鮮明。

包裝同Gimmick之重要性大家都知，但好多人都忽略後面嘅事實 : 好奇心只能令人試第一次，要繼續買，需要嘅係品質。尤其係Wine，一聞香，一入口就知龍與鳳，就算包裝幾靚都無得呃人。