男人嘅世界入面，有啲野係你必需去到成熟階段先會識欣賞，例如醇酒、腕錶，同埋雪茄，隨著識見漸豐，你會懂得分辨甚麼是好嘢，甚麼是高質，懂得享受同厚待自己。如果你明白箇中含意，咁呢隻 Zenith X Cohiba 對你而言，必然係極具吸引力嘅夢幻逸品。

腕錶全名 El Primero Chronomaster 1969 Cohiba Edition，係瑞士鐘錶巨頭 Zenith 為慶祝著名雪茄品牌 Cohiba 50周年，特別推出嘅獨家紀念版。Zenith 出名複雜機械錶特別勁，品牌價值講求正統、專業精準，同一流品味，而呢啲哲學又同 Cohiba 嘅形象不謀而合，所以就促成咗今次嘅 Crossover。

Cohiba 以手工製頂級雪茄聞名於世，66至82年間，係古巴政府外交送禮嘅指定物品，其煙草皆精挑自最佳質產區Vegas de Primera。Cohiba特別之處在於將 Seco 同 Ligero 放入木桶混和再進行額外發酵，令雪茄具有更複雜嘅香氣同層次感。

講返隻錶，Zenith El Primero Chronomaster 1969 Cohiba Edition只會出50隻Rose Gold同500隻Stainless Steel版。兩者盤面同樣係充滿雪茄色彩嘅琥珀色調，設計上保留咗好多 Cohiba 嘅圖案，例如中間黃色同黑底白點嘅垂直線，而Zenith字樣下面仲有Taino 印第安酋長嘅頭象。

優雅簡潔嘅線條，仍然充滿Zenith嘅腕錶風格，42mm錶殼之中，搭載El Primero 4061自動上鏈計時機芯，11點位置可以見到佢個鏤空設計，每小時振頻達到36,000次，並有有天文台 COSC 認證，提供到超過 50 小時嘅動力儲存。