呢個叫“Bbox” 嘅紙包裝，來自一家叫“Awesome TLV” 嘅創意設計公司，佢地聲稱要將飲酒呢件事變得更年輕化同更有玩味。

不能否認葡萄酒樽又重又易碎，相比之下，“Bbox” 嘅紙盒更輕巧易攜，而且唔會打爛；盒頂加多個手抽位，拎嚟拎去無難度。同酒樽嘅另一大分別就係佢無酒塞嘅煩惱，唔需要特登搵開瓶器，亦唔會有斷塞碎塞嘅問題。

盒中有一個3 Liters嘅袋裝住啲葡萄酒，加埋一個有開關嘅Tap，有效隔阻空氣，使酒液長時間都保持新鮮，而飲家唔需要一次過飲哂一整盒，都算係一大好處。

Awesome TLV 嘅設計師話啲飲家買酒，最終目的都係想飲酒啫，所以應該要盡量方便佢地去做呢件事。講得振振有詞，但我就不敢苟同啦，品酒始終係生活態度，唔係吸收酒精咁簡單。葡萄酒樽某程度上嘅麻煩、或者複雜性，其實係佢嘅優雅同可貴之處，透亮流線形嘅酒樽，進而利落地醒酒，搖晃一下酒杯再細心觀察瓶身酒標嘅設計，呢啲元素都被省略的話，仲有何樂趣可言?