Tomatin 8年1L裝，美國橡木桶加歐洲雪莉桶嘅經典配搭。雖然非常年輕，但仍然擁有好迷人嘅雲尼拿香，烘焙蘋果、成熟啤梨嘅水果氣息。雪莉桶帶來適度嘅薑味辛辣，玉桂、香料味道形成優美嘅點綴，酒精度40%，售價€35。

更進一步係1公升裝嘅Tomatin 12年，奪得今年San Francisco World Spirits Competition Double Gold嘅旗艦作品，同樣係美國橡木桶加歐洲雪莉桶嘅調和，多幾年嘅陳釀，變化出更香濃嘅雲尼拿、水果蛋糕、花香蜂蜜甜味，甜度之中帶有白胡椒嘅香辛，餘韻悠長而溫暖。酒精度43%，售價€42。

15年用返700ml瓶裝，北美橡木桶陳釀熟成，輕盈而清新嘅酒香係呢枝作品嘅Signature，伴隨些少拖肥、紫丁香嘅味道，入口嘅候酒體仍然豐潤，柑橘果香、蜂蜜、拖肥香甜漸漸散發，亦能感受到充足嘅橡木桶氣息，最得意係有少少鹹香，加埋啲啲香辛，極之Easy Going。酒精度46%，售價€55。

最後嘅40年陳年佳釀喺本系列之中最為矚目，西班牙Oloroso雪莉桶嘅陳年為呢枝作品帶來深邃嘅酒色、極具深度同層次嘅酒香，甫一開首係菠蘿、香蕉等熱帶水果，逐漸變化出辛辣同木桶氣息，轉化過程之中可以感受到類似亞麻籽油嘅香氣。雖然陳釀已久，但酒體本身仲係充滿生命力，餘韻為溫暖成熟之香桃。酒精度43%，售價€1,250。