如果未飲過Krug嘅Grande Cuvée，真係唔好話俾人知自己鐘意飲Champagne。作為頂級香檳品牌，Krug嘅Vintage Bottle並非主角，整個品牌最重要嘅核心作品，係Grande Cuvée系列！

由跨越至少10個不同年份，達 120 種以上嘅基酒調配而成，最後更要存放於酒窖陳年7年以上，先可以令Grande Cuvée擁有咁優雅迷人嘅特質。KRUG嘅釀酒師每年首要任務就係調釀出新一批Grande Cuvée，佢地會使用最好嘅資源，保證新作品繼續達到最高標準；而Vintage年份酒旨在反映出該年特色，論資排輩，的確無得同Grande Cuvée比。

由於每年收成、葡萄狀態不一，大家可以想像到Grande Cuvée會隨批次擁有不同嘅特性同變化。KRUG新推出嘅 “EDITION” 編碼理念，就係俾飲家更了解每一批Grande Cuvée嘅背景。喺酒標上面，大家會搵到一個 “EDITON” 編碼，憑住呢個號碼就可以查出呢枝Grande Cuvée到底係咩年份推出，同各種關於該瓶香檳嘅故事。

今年年底KRUG將會推出首批擁有編碼嘅Grande Cuvée — 以2007年收成葡萄釀製嘅第163版 “163^ème edition”。呢個功能除咗可以俾到飲家更多資訊，更重要係分辨到邊一版更具收藏價值，亦屬銷售策略嘅一種。