唔記得邊位講過，要了解一個國家嘅人民質素如何，最簡直就係睇當地人點樣對待啲動物，有國家可以用食狗肉做一個節日主題，同時都有國家拼盡心力，保育當地嘅野生生態。兩年前Black Jaguar-White Tiger Foundation喺墨西哥成立，旨在同墨西哥政府合作，保育貓科為主嘅各種動物，為佢地提供最好嘅生活環境、醫療，同埋食物等配套。

如果有follow佢地Instagram嘅朋友，每日都可以見到啲猛獸 (獅子、老虎、豹) 同基金行政總裁Eduardo Serio玩到攬頭攬頸，你會知道佢地真係用生命保護啲動物架。

Hublot一向鐘意玩Crossover，從超級跑車到旗袍繡綉，涵藝範圍之廣，可謂應有盡有；不過我今年最鐘意嘅，都係呢款Hublot big Bang Black Jaguar & White Tiger Foundation，黑豹白虎保育基金會限量腕錶。於Hublot公佈消息之前，我地早已經喺Black Jaguar-White Tiger嘅社交平台度收風，Eduardo仲話今次完全係錶商主動搵佢合作，並非佢R Sponsor嘅結果。

今次雙方共同發表3款以貓科動物為主題嘅限量錶，每隻嘅錶盤都有虎面圖紋，黑色橡膠錶帶亦有虎皮斑紋，霸氣十足，不過睇得Eduardo啲片太多，而家覺得獅子、老虎、豹都可以好痴人、好得意！

44mm錶殼，分別有黑色噴砂陶瓷、拋光精鋼、18K玫瑰金3個款式，均配搭HUB1401自動上鏈機芯，振頻為4 Hz (每小時28,800次)，提供到42小時嘅動力儲存。

以錶迷角度可能覺得今次Crossover無咩突破，又係玩主題，不過只要你係Black Jaguar-White Tiger嘅支持者，你會覺得呢次合作無比有愛，好想訓身力撐。

陶瓷款限量100隻，售價約為12萬港元；精鋼款同樣限量100隻，售價約9萬5千港幣；最後嘅18K玫瑰金款最珍稀，限量50隻，售價約為27萬港幣左右。