文：MenClub Raphael 圖：互聯網
POSTED ON 09 Nov 2016
| 精米步合，係指清酒嘅釀造過程之中，將酒造好適米磨剩幾多%，大家好熟悉嘅獺祭二割三分純米大吟釀，「二割三分」就係講緊精米步合為23%。根據日本法例規定，Sake只要精米步合低於50%已經可以叫大吟釀，磨得更多只為更佳嘅口感同風味，完全係超額完成。今次同大家講呢枝夢雀，竟然擁有一割八分 (18%) 嘅夢幻級精米步合，於品嚐先之先，其工藝已經震驚強國13億人啦。 |
|
| 要將酒造好適米磨到50%已經唔容易，因為杜氏要確保過程之中，粒米唔會被磨碎，山田錦之所以叫清酒米之王，其中一個原因係佢耐磨，較為容易造出大吟釀級數嘅靚酒。夢雀 (MUJAKU) 純米大吟釀做到18%精米步合，但就並非用常見嘅山田錦，而係用被譽為「奇蹟之米」嘅伊勢光 (Isehikari)。 |
一割八分 — 精米步合 18%
|
| 伊勢光米嘅由來，要數到27年前，日本遇上兩次巨大颱風吹襲，「伊勢神宮」前面嘅稻田被完全破壞，剩低兩株稻穗仍然屹立不倒。於是呢兩秼稻穗就被山口縣國家農業實驗中心拎去研究，發現呢隻米嘅品質超乎想像地好，極其強壯，好適合釀酒。然後夢雀嘅杜氏就以有機耕作嘅方式，親自培植出一級嘅伊勢光米，先做到呢枝18%精米步合嘅佳釀。 |
奇蹟之米 — 伊勢光
|
| 夢雀擁有極之罕有嘅豐腴香氣，富有熟成蜜瓜、草莓清香，口感清新且非常醇滑。同日本菜故之然襯到絕，配中餐、意大利菜亦能夠突出到枝酒嘅甘香味；用Wine杯品嚐更加集中到其優美嘅酒香，再講多次，現代嘅Sake，唔一定要用返Sake杯飲嘅。 |
|
| 夢雀全球限量只有1,000枝，除咗日本之外，得杜拜、法國，同埋香港有得賣，而香港更加係繼東京之後，第二個發佈地區，足見日本對香港清酒市場之重視。不過叫得做夢幻逸品，仲要如此珍稀，價錢當然有返咁上下級數，要試到夢雀純米大吟釀，香港零售價做緊HK$6,800，絕不比波爾多、布艮地嘅葡萄酒遜色! |