威士忌同望遠鏡有咩共通點? 一、兩者都需要頂級工藝精製，二、兩者都需要時間慢慢細味，三、夜晚用 / 飲特別正。如果屋企夠大，我估我都會整返枝望遠鏡，喺寫完稿嘅時間，慢慢歎著杯蘇威，再沐浴於璀璨嘅香港星空。有呢個諗法，係因為前陣子蘇格蘭單一純麥威士忌The Balvenie帶咗佢地枝私家Telescope嚟香港，再喺尖咀Sheraton頂層嘅Sky Lounge飲到12至21年嘅作品，享受如此，夫復何求呢！

是咁的，2014年The Balvenie成立咗一個The Balvenie Commission基金，用嚟表揚一啲同自己一樣擁有卓越工藝，來自不同界別嘅頂級工匠。去到2015年，基金嘅澳洲分部突然希望整枝The Balvenie望遠鏡，等啲酒迷可以邊飲頂級靚酒，又可以欣賞到悉尼嘅夜景。於是佢地就搵咗現居於倫敦市郊嘅Mark Turner，一位同時係室內設計師、雕塑家、攝影師嘅獲獎園藝家，而最後去到香港嗰枝就係世上僅有4枝之一，出自Mark手嘅The Balvenie Telescope。

Balvenie搞得呢個基金，必然係對自家嘅釀酒工藝非常自豪，其中佢地特別強調5大手工技藝 : 自行栽種大麥、維持鋪地發芽、顧用自家銅匠、信靠自家桶匠，同埋最重要，屬於佢地嘅首席調酒大師David Stewart；多方面鉅細無遺嘅配合，先可以成就Balvenie咁獨特嘅蜂蜜香甜氣息，仲有平衡柔滑嘅絕妙口感。

而家呢枝The Balvenie Telescope將會由起日起至12月31號，繼續喺尖咀Sheraton嘅Sky Lounge展出，為咗配合呢次特別展覽，駐場Bar Captain Teddy Sham 仲設計咗4款以Balvenie為基調嘅特色雞尾酒 : Clock Tower、Victoria Harbour、The Peak Tower、Central Plaza，全部以香港地標為題，同大家睇到維港景致做返個呼應，歎靚酒並睇世界級嘅香港夜景。