我知我知，印度最出名肯定唔係威士忌，但喺MenClub我都介紹過Amrut真係好嘢嚟。近排美國威士忌雜誌《Whisky Advocate》喺網上公佈咗第23屆，各個地區嘅最佳威士忌，而擊敗一眾蘇格蘭、日本強敵，繼而問鼎世界冠軍寶座嘅，係來自印度嘅Amrut Spectrum!

Amrut舊年公佈嘅呢支作品，真心係一次大膽嘅實驗，原液先喺Bourbon桶熟成3年，再置入一個由5種木材組成嘅新桶入面3年半，其中包括 : 美國新桶、法國新桶、西班牙新桶、Oloroso雪莉桶同埋PX雪莉桶。話佢係六神合體嘅威士忌實不為過，亦係世界上首次有蒸餾廠做到咁癲，話哂Whisky最講Balance，唔係將啲橡木桶隨便炒埋一碟就交到貨。

好明顯Amrut Spectrum就係一個成功嘅例子，酒液彌漫濃郁嘅朱古力、咖啡香氣，Aroma上仲感受到橡木桶帶來嘅香辛，核桃、芒果皮嘅香甜。入口仍然係朱古力、咖啡嘅味道，會慢慢變化出堅果油同埋橡木桶所帶出嘅辛澀。首批推出嘅1000枝好快就被搶購一空，如果想買，可能要等到2017年，Amrut再次準備好特製木桶先。

至於蘇格蘭就區分成 : Lowlands/Campbeltown、Highland、Islay Island、Speyside呢幾個大區。得獎作品分別係Ailsa Bay、Brora 38年、Lagavulin 25年、Glenrothes Vintage Reserve；而Glenrothes呢枝確係相當特別，由10款不同年份嘅原液混釀而成，1989、1992、1997、1998、2000、2001、2004、2005、2006、2007，唔好以為老酒成份佔好少，1989酒足足佔枝酒嘅25%，形成一種具層次嘅香甜雲尼拿味。

日本地區嘅得獎作品係余市，仲要無年份版本，而家對Yen咁鬼平，仲要唔難買！如果你去開日本，或者有朋友去日本，點都帶返枝過嚟啦，前排喺北海道見到，連稅都係5000 Yen有找，唔買真係對唔住自己!

Source : Whisky Advocate