Wine Enthusiast又走上號稱雞尾酒之都嘅紐約街頭，挑戰下班酒徒嘅「常識」，其實大家拎住杯酒，都未必知道入面溝咗啲乜，又或者隻味點嚟。呢次街頭測驗有幾題都頗深下，想知答案嘅，入睇呢個度睇下啦。

ABV其實係乜嘢?

答 : Alcohol by Volume，講緊你酒精濃度有幾多，公式係20°C之下，每100ml嘅酒精飲品入面，含有幾多ml純乙醇，通常係用 % 嚟呈現。蘇格蘭威士忌必需要40% ABV 或以上，而美帝威士忌就用Proof，都係酒精濃度，但就需要除2，即100 Proof等於50% ABV。

Vodka係用咩整?

答 : 基本上任何可以蒸餾嘅嘢都可以整Vodka，係咪好過癮呢！原料多為穀物、薯仔，而俄國、波蘭嘅Vodka就出哂名靚。Vodka係追求純淨嘅酒液，所以啲酒商成日標榜自己蒸餾幾多次，飲落去有幾咁順滑。

Jigger其實係乜?

講多無謂，睇圖最實際。我勸大家唔好直接Google呢隻字！

答：調酒用嚟度分量嘅量酒器，通常兩頭 30/45ml，即1 & 1.5oz，最常見。

Cane Sugar (甘蔗) 係拎嚟整咩酒?

答 : 其實唔難，只要你係愛Rum之人。Rum酒係加勒比海特產，原料可以係糖蜜或者Cane Sugar (甘蔗)，同樣有發酵、蒸餾、陳釀3步曲，濃郁香甜嘅風味絕對令人無法抗拒！(段片有條友答Vodka，大佬，你幾時飲過正統Vodka係好甜架?)

Grenadine係乜嘢?

答 : 呢題都幾難，單單鐘意飲酒都未必識佢。Grenadine其實係紅石榴糖漿，用嚟增加甜度、果香同埋加啲紅色落杯Cocktail度，都算係調酒用常見嘅原料。

Gin最主要嘅味道係乜?

答 : 呢題都比較易，Gin即係杜松子酒 (Juniper berry)，係杜松子樹嘅莓果，16世紀有個荷蘭藥師用杜松子嚟整藥，主要係利尿，醫痛風呀，幫助消化等等，但去到今時今日，Gin嘅作用多數係令人Hangover。

Negroni係啲乜

答 : 史上最易嘅一題，因為MenClub Cocktail Tutorial都教過大家整，唔計各種變奏，最傳統嘅Negroni係Gin + Campari + Sweet Vermouth，甜與苦澀之間嘅平衡，易整又好飲。

Shaking Bruises Gin真唔真?

答 : False。呢個係爭辯咗好耐嘅問題，因為調酒界多數會講Gin只能Stir不能Shake，但又有另一派學說指其實無特別既影響，啱客人口味就得，所以James Bond都會話「Shaken, not stirred」。

蘇格蘭威士忌嘅煙燻味點嚟?

答 : 雖然佢答案講Peat，但煙燻 (Smoky) 同泥煤味 (Peat) 其實有好大分別，煙燻係好似你燒著嘢嘅味道，而泥煤係正露丸味，不能混為一談。煙燻味可以來自大麥嘅煙燻烘乾過程、又可以來自烘烤過嘅橡木桶，蒸餾時過熱都會有焦化情況導致威士忌Smoky。

Source : Wine Enthusiast