隨著全球飲家對威士忌嘅需求大增，每隻靚威都不斷加價，有啲年份佳釀甚至被炒至天價。原因好簡單，因為威士忌係時間嘅產物，21、30、35、50年，當年釀咗幾多，今日就得幾多飲。同樣因為年份酒供不應求，所以好多大廠都開始行Non-Vintage路線，好似Macallan嘅Rare Cask就將焦點放喺木桶，避開咗年份嘅束縛。前陣子西班牙就有一項研究，利用Ultrasound超聲波加速烈酒嘅陳年過程，幾日就換來幾年嘅效果，聽落簡直係全球Whisky飲家嘅救星！

不過今次University of Cádiz嘅研究人員用Brandy白蘭地嚟做實驗，而非威士忌。威士忌嘅原料係穀物，而白蘭地則用果酒再加以蒸餾，但兩者都係要經過長年嘅木桶熟成，一樣咁花時間。簡單而言，研究人員將美國橡木桶嘅碎片配合蒸餾過嘅果酒之中，然後再以Ultrasound誘發更多bioactive compounds。最後啲超聲波白蘭地被專業品酒師高度讚揚，仲話同陳年老酒一樣咁正添。

其實佢地都唔係首批嘗試加速Maturation嘅科學家，之前美國嘅化學家Orville Tyler已經試過喺威士忌木桶度加入氧氣同超聲波，從而加快酒酯嘅形成；Cleveland Whiskey就用一種不鏽鋼容器為橡木桶加壓，希望加速木桶與酒液嘅化學反應。不過上述咁多種方法，暫時都未有一種能夠同真正嘅陳年時間媲美，但我地仍然樂意見到多啲呢類研究，唔試多啲最後點會成功呢。

但即使真係成功做出科學陳年嘅威士忌，我地仍然有好多問題要解決，例如蘇威喺法例上就規定至少要有3年熟成，用咗科學加速之後，就未必可以叫Scotch啦。另外烈酒業界可能要為科學陳年嘅作品開多個新類別，又或者再立多幾條法監管產品質素，可以預計得到將來仍有好多問題要解決。迢迢長路，若果今朝有酒，都係飲咗先算啦！

Source : Quartz