相信大家都試過唔小心整濕咗條褲，而感到非常尷尬，好怕其他人覺得你瀨尿。不過凡事都有例外，總有人唔覺得尷尬之餘，更認為係一種美感。美國品牌「Wet Pants Denim」就睇準商機，推出一條「瀨尿牛仔褲」，用特別洗水效果模仿尿濕，更以「Wet Look, Dry Feel」為品牌口號，強調條牛仔褲睇落好似濕咗，但著上身包乾爽！

（圖形截自：Wet Pants Denim）

據CNET報導，「Wet Pants Denim」創辦人係一位唔願意透露姓名嘅20幾歲曼哈頓人，記者起初都以為條褲只係惡搞，為咗搞清楚係咪真有其事，《Mel》雜誌記者Calvin Kasulke就親自買咗一條，直到見到送嚟嘅牛仔褲真係有「水漬」，先知原來間公司係認真。

據官網介紹，每一條牛仔褲都係純手工單獨製作，買家可以選擇深藍色、淺灰色或白色牛仔褲，再配上唔同顏色嘅「水漬」。另外，買家亦可以自行提供牛仔褲，再由佢哋幫忙染色，服務非常周到。如果大家嘅審美觀同Wet Pants Denim對得上，又或者想買嚟整蠱朋友，一條褲都只係要75美元（約$580港幣）。

資料來源：CNET、Mel、Wet Pants Denim