日本「寨城」 3D立體遊「軍艦島」

文：MenClub 魏文青　　
POSTED ON 19 Jun 2015

日本「軍艦島」大家都應該有聽過，但你又去過未？不過就算去過，都因為安全理由只可以喺特定位置參觀。如果要睇哂呢個人口密度曾經係東京特別區9倍嘅半人工島，有兩個方法：第一，係偷偷地爬入去(應該就係犯法嘅)；第二，係可以睇咗呢條由長崎大學以3D掃瞄整個島再組合而成嘅3D片。

原名「端島」嘅「軍艦島」係一個位於日本長崎市外海嘅半人工島，由於直接連在海床的煤炭沉積土上，早喺19世紀明治時期就已經有人在島上採煤。1890年時由三菱財閥控制，後來就因為要滿足煤炭工人同家人嘅日常所需而漸漸建成一個集住宅、學校、商店、醫院、寺廟、戲院等等社區設備於一身嘅密集式都市。1960年最高峰時曾經有5267人住喺6.3公頃土地上，成為比人口密度比東京更高的地方。但隨住煤炭需求減低，島上嘅居民都相繼外移。
端島因為遠睇似一艘軍艦，故又名「軍艦島」
直到1974年1月，三菱財團正式關閉島上煤礦、遷走島上居民，直至同年4月20日全部遷出，軍艦島正式成為無人島。然後空置咗40年，到2001人三菱把軍艦島無條件轉讓予長崎市政府。起初因為建築物日舊失修有倒塌危險而禁止一般人進入，後來喺島嘅南邊興建步行道先開放部份成為旅遊景點。

而日本長崎大學就以攝影機、無人機以及鐳射掃瞄紀錄整個軍艦島嘅裏裏外外，再合成以下呢條高清調查片。等一般人都可以一窺島上全豹。 https://youtu.be/DYIxWZ2cpNI https://youtu.be/q8nlh3CmKL4