男仔由細到大都畀人灌輸一種「唔好驚！」嘅概念。細細個見到隻大過自己嘅狗，淆底豬，父母叫你︰「男仔嚟架！唔好驚！」；見到成隻寄生獸咁嘅小強，淆底豬，父母又話︰「男仔嚟架！唔好驚！」；仆親流到成腳都係血，淆底豬，父母又係嗰句︰「男仔嚟架！唔好驚！」

整你個掣！乜都唔好驚，咁男仔幾時先可以驚得？！雖然話唔驚唔驚，心入面真正嘅恐懼邊個都阻唔到！最近日本網站geitsuboo.com就針對男生做咗項調查，選出「覺得自己可能有嘅恐懼症」，巴打們又有冇驚啲咩呢？

8位（並列）　懼低症、失敗恐懼症、嘔吐恐懼症　3.6％
雖然相對於懼高症，比較少聽懼低症，但原來都有人存在呢種恐懼！至於失敗恐懼症，會唔會係大家都受到太大壓力，活喺大眾期望下，而衍生出來呢？嘔吐咁唔舒服，諗吓都覺得驚，有呢種恐懼症都正常嘅～

6位（並列）　女性恐懼症、血液恐懼症　4.5％
成日睇動漫，總有啲人見到女仔就驚到面青青；有啲人見到血就暈，應該就係指呢兩種恐懼症喇！

5位　針頭恐懼症（尖端恐懼症）　7.3％
好多人見到尖銳嘅物件例如刀、鉸剪、針等等，都會毛管棟，覺得自己好似會被刺傷咁。

2位（並列）　幽閉空間恐懼症、對人恐懼症、昆蟲．蜘蛛恐懼症　8.2％
喺細小空間下，唔少人都會有種侷促感覺，覺得不安，呢種就係幽閉空間恐懼症；亦都有人對於面對人感到害怕。至於怕昆蟲，其實唔係女仔專利，男仔一樣都咁驚。

1位　懼高症　38.2％
嗰種怕從高處跌落嚟嘅感覺，驚都好正常吧？