職場上少不免要應酬，講出違心嘅說話，明明夜晚約咗Friend子唔想去見客，一路行去目的地時仲西口西面講晒對方壞話，一去到見到個客，就即刻要自動變臉，烚熟狗頭咁笑晒講聲︰「Nice to 搣 You！」你話幾鬼虛偽呢！冇法啦！搵食就係咁，大家心照！

對於禮貌周周嘅日本人嚟講，職場上講客套嘢就梗架啦，之不過咁多句當中，邊句最常聽又最假先？日本網站「MyNavi」就訪問咗600個網友，投票選出成日聽到，但大家都知係假話嘅客套說話，巴打又有冇心水係邊句呢？

第5名
「好多謝你話我知咁重要嘅事呀！」／「今日真係好開心！」 (9.1%)
老老竇竇，真心教你嘢當然會真心多謝。但好多時對方都係講埋啲濕星嘢，一副你咁蠢鈍如豬，等我教精你嘅樣子，就算你把口話多謝，心入面咪又係會諗︰妖！你唔講我都知啦！／「今日真係好開心！」 ？呢句淨係公司搞活動唔使做嘅時候先適用吧？...

第4名
「等我升咗職，記得畀我請客！」 (9.4%)
哦，你升咗職先算啦～

第3名
「可以入到呢間公司真係太好喇！」 (9.7%)
真係？咁平時又成日聽你呻呢呻路嘅？

第2名
「我都希望自己可以好似XXX一樣咁叻呀！」 (16.1%)
唔可以否認，有啲人真係好叻好值得自己學習，但多數講得呢句，個XXX都係自己上司，仲要對住上司當面講。

第1名
「真係好多謝你呀！我又學到嘢喇！」 (25.1)
喂！我今日真係學到好多嘢呀！我學到點樣對住廢柴都仲識笑呀！蝦蝦蝦蝦蝦蝦蝦！