最近多宗學生跳樓案令人痛心，由上年9月開學至今，已經有多達23個學生輕生，最誇張係9日內有7宗自殺案件。可能部分人覺得而家嘅學生太脆弱，少少壓力都承受唔到，但每個人嘅感受都唔同，而家諗返起，讀書時嘅經歷可能好小事，但回憶當下嘅感覺，即使係一個測驗，都曾經令我哋緊張不已，更何況今時唔同往日，社會對學生要求愈來愈高︰以前識彈琴係才藝，而家識彈琴係基本，整個社會學習模式都唔同，我哋已經無法用自己一套套落學生身上。而且現實係，現今的確好多學生承受重大壓力，被情緒困擾，當務之急，應該給予佢哋更多關懷，而唔係一味話佢哋軟弱乜乜乜。

不過面對受情緒困擾嘅人，關心都要有特別技巧，單單說教或者講︰「加油！」、「唔好唔開心啦！」、「唔好諗咁多！」，未必鼓勵到佢哋，有時遇著敏感情況，反而加重佢哋負擔。咁我哋有咩說話係唔應該講出口呢？外國網站buzzfeed就列出好幾個例子。

1. 人哋仲慘過你
人比人比死人，呢句說話唔單只幫唔到佢哋，反而令佢哋更灰。
建議講法︰「有咩我可以幫到你？」更顯你對佢嘅關心。

2. 明天會更好
其實咁樣會畀對方好大壓力，因為佢長期承受各種不愉快，深明第二日唔會有咩好轉，生活一樣咁過，唔會戲劇性咁突然有所改善。
建議講法︰「我會每日喺你身邊陪你度過難關。」

3. 人生就係唔公平
人生係好唔公平，但受情緒困擾時再咁強調，只會打擊對方。
建議講法︰「發生呢啲事真係好替你難過，但唔使怕，一定會順利度過。」

4. 點解你唔好好面對件事
其實對方好多時都遇到有心無力嘅情況，而且每日都自己心理及精神做鬥爭。
建議講法︰「你唔係一個人頂硬上，我會陪住你。」

5. 你咁憂鬱唔係辦法，都要繼續生活落去
對被情緒困擾嘅人而言，生活係冇出路，與其咁生活，不如死咗去算。
建議講法︰「生活仲有好多精彩嘅事，我會陪你一齊去探索。」

6. 我明白你嘅感覺，我都試過唔開心
冇人會有完全相同嘅感覺，咁樣講會令對方覺得你唔重視佢嘅感受，視佢嘅唔開心係好小事。
建議講法︰「我雖然冇辦法無法完全理解你嘅感受，但我會盡最大努力去了解。」

7. 你咁樣實在係太自私
冇人想唔開心亂諗要人擔心，但唔開心佢自己都控制唔到，所以千祈唔好去責怪佢哋。
建議講法︰「我可以做咩令你個心覺我舒服啲？」

8. 出去玩吓放鬆吓就冇事啦
有啲唔開心唔係玩完就冇事，如果玩完可以解決一切，就唔會需要社工同心理醫生啦。
建議講法︰「我可以借個膊頭畀你依靠，你有咩唔開心我哋可以食吓飯傾吓偈，我會好樂意陪你。」

9. 你成日咁唔開心，我都畀你搞到心都煩埋
受情緒困擾嘅人無助感比平常人高，佢哋最需要親朋好友嘅理解同幫助。
建議講法︰「見到你每日咁痛苦我好難過，如果可以嘅話，我好希望可以幫到你。」

10. 個個都有煩惱，人哋面對到點解你面對唔到
每個人承受壓力嘅程度唔同，唔可以一概而論。
建議講法︰「我知道你而家好痛苦，我只想你知道，我會一直都陪住你。」