1. 放低你的「自尊心」

作為男人平日對人對事當然要維持自己的「自尊心」，但當兩個人鬧交之時，你的自尊心卻會成為兩人和的最大障礙。所以網友的建議是如果真是自己做錯，就要大方承認；而如果對方先認錯了，你就原諒他吧。

文青備注：

阿媽教落「錯就要認，打就企定」所以如果真係自己做錯就真係唔好死撐。但實際運行的難處就在於情侶鬧交通常都是圍繞住一啲無分對錯嘅事情。比如佢話你「掛住打機唔陪佢睇電視」，你就覺得「已經陪咗佢一日，打鋪機都唔得？」呢啲絕對是口同鼻拗的事。如果你只為了息事寧人而火速跪低，有啲女人就會打蛇隨棍上，逼你簽訂大量不平等條約，到時你喊都無謂。

所以，與其說要「放低自尊心去認錯」，更多的時候男人是要「放低自尊心去解釋自己的想法」，尋求女朋友的明白，希望一人讓人步。如果你女朋友係個好女仔佢就一定會應承你嘅！

2. 不要拖

網友指如果吵架的時期一拖長，即進入冷戰，只會令女生繼續胡思亂想，很有可能會令「今晚食咩好」的老生常談上綱為「究竟佢係咪真係啱我？」的重要決定。所以吵架不要拖太久！

文青備注：

台灣藝人陳建洲與老婆范瑋琪就曾經分享過他們的愛情條款，其中有一條就是「吵架當日就要和好」，觀乎他們拍拖到結婚多年仍然恩愛如常，這個條款似乎還定得不錯，但我認為這更加有賴於兩人的性格。如果你遇上的是只要有些少不如意就會立馬進入「你唔愛我啦Death Metal Disco Remix版」的女生，你要一日之內和好仲難過爭真普選！在這個時候不彷比啲佢（同你自己！）冷靜一下，可能數小時，可能一個晚上，然後再嘗試和好。不過，我認同的是女人真係傾向亂諗嘢，所以就算過冷河都唔可以太耐！

3. 「有咩三口六面拆掂佢！」

在這個Whatsapp、Wechat一街飛的年代，無論鬧交定和好，很有可能都是用文字表達。網友指只有面對面的對話才能讓雙方真正明白對方的想法。

文青備注：

在人與人的溝通中，你講咗啲咩唔緊要，你點講先係最重要。純文字討論的最大壞處就係對方唔會知道你講的語氣，所以他很有可能會把你一番深情說話理解成其他意思，令事情更複雜。同樣地你也沒法知道對方的表情反應，明明對方已經服軟，你還以為他還在死撐。所以，一定要爭取會面，就算真係唔得都一對要講電話，好似我哋呀特首咁日日拍片呢啲單向溝通就唔係一個好方法啦！

4. 「需要理直氣壯」

網友指直接將見面地點，時間告訴對方，然後在約定時間出現，等到花兒也謝了都要繼續等。一方面表達決心和誠意，二來亦是爭取回面的好方法。

文青備注：

的確是個好方法，但小心稍一差錯便會令對方覺得你是在威脅他。平靜的提出見面地點、時間，然後按時赴約是要點。假若對方恨下心不來，你也知道了自己的重要性。

5. 準備小禮物

所謂「雞髀打人牙骹軟」，在見面時準備一份小禮物是表示誠意和關心的好方法，對方收咗你份禮就算啖氣未落得哂，態度都一定會軟化！

文青備注：

記住記住記住係「小」禮物！！！唔好郁啲就出啲咩金鍊首飾，iPhone手袋呢啲貴重物品。一來對方可能會覺得你用錢撻佢，二來做咗一次，以後佢都會覺得呢啲嘢係基本，如果佢有一絲邪念，仲好有可能會當你ATM咁撳！所以切記是「小」禮物！最好仲係有啲心思嘅！

6. 輕微的身體接觸

輕輕碰一碰對方的手臂、幫對方整理頭髮等的小動作，會透露你想和好的意圖，如果對方都想和好而又唔太蠢，佢都作出適當的回應！

文青備注：

切記身體接觸一開始要有試探的心，亦要有準備人家會一手甩開你。而且動作要輕微但實在，不要令人感到輕挑浮躁，又或者心存歪念。另外提一提大家，電影中出現「和好性愛」－即是男女主角明明好嬲，但一上完床就當冇事發生的情節－很少有！比起隨時Ready的男人，女人更需要一個適當的氣氛和情緒，唔好以為將人家撲到在床就叫完滿解決！

7. 扮哂蟹

黎到最後一步，如果確認對方有意和好，扮下傻仔，搞兩句GAG緩和氣氛，如果唔怕嘅仲可以扮下可愛，對方一笑，功德完滿啦！

文青備注：

小心對方當初嬲你嘅原因唔係你太低B、長唔大又或啲GAG太爛呢類原因，否則可能會重燃戰火！

另外補充的就是一對情人，理應要互相遷就，如果只有其中一邊單方面遷就另一方，這基本上是主僕關係。所以雖說男人應該要有包容女人的胸襟，但記住「棒槌與蘿蔔，兩手都要抓，兩手都要硬」，寵個公主出黎，你唔單止自己瀨嘢，仲會影響下一個！！