真人芭比　你玩唔玩得起？

文：MenClub Patrick　　圖：互聯網
POSTED ON 30 Dec 2014

老老竇竇，我唔知今時今日仲有冇細路鍾意玩Barbie（芭比），甚至相信而家班咁「天真無邪」嘅細路，一見到Barbie，都只會拋低一句「這麼醜的妞」。不過最近出現喺法國嘅呢幾個真人芭比，就可能有唔少男士想同法官大人講，有得＿一定＿（＿＝玩），最好可以好似模型咁有得砌添。呢壇嘢其實係源自《Vogue》雜誌喺巴黎嘅一個活動，其間意大利攝影師Giampaolo Sgura搵嚟Magdalena Frackowiak同Elisabeth Erm兩個超模，要佢哋化個硬膠妝，企喺掛滿衫褲鞋襪手袋嘅包裝盒布景入面扮真人Barbie，影成呢輯相。我深信，男人見到咁嘅環境，都想當正佢哋Barbie咁玩，幫佢哋除衫着衫。但唔該請睇清楚啲道具係乜衫嚟，係Valentino、LV、Saint Laurent等12個名牌呀！就算你條女肯扮芭比畀你玩，閣下都真係要諗諗玩唔玩得起喎，除非你係洗米華啦！