毒L改變世界互動式攬枕被摸會嗌

文：MenClub 魏文青　　圖：互聯網
POSTED ON 02 Mar 2015

本文青一直認為「懶」，係人類文明發展中一個非常重要嘅原動力。你睇下由石器到飛機大炮，宏觀整個人類史上的所有重大發明，萬變不離「方便」二字，而人之所以追求方便，咪就係因為懶囉！而進入廿二世紀，除咗懶之外嘅另一個人類進步原動力，就係「毒」！毒L們的購買力有幾咁犀飛利，憑日本有個專有夠詞「宅經濟」就可窺一二，而毒L們的創造力就更加係會嚇你一跳添！好似我哋介紹過嘅VR技術，再加有介紹過嘅互動式飛機杯，同埋以下呢個識叫識嗌識呻吟嘅攬枕，簡直就係毒L們夜闌人靜、甚至光天化日的完美慰藉組合！

呢個「痛すぽ」嘅發明者內村康一本身就係一個動漫宅男，最鍾意嘅角色就係來自《幸運☆星》中的小鏡，而佢本身都擁有一個小鏡攬枕。每晚臨瞓前佢都會同小鏡訴說當日發生嘅事，而就係呢個烏燈黑火之時，佢就突然諗到：「如果個攬枕識應我，佢你話幾好呢？」於是佢就整咗呢個「枕葉リナ」出黎！

作為一個「互動式攬枕」，當然唔係捏下佢隻手佢就播錄音咁低智能。リナ醬會根據你摸佢唔同部位而發出唔同聲音，例如輕撫佢個胸，就會發出「喵喵」聲；摸佢大脾仔就會叫「唔好，呢到唔得！」。

「我明啦！即係佢可以任我魚肉啦！」咁又唔係喎！因為作為一個紳士，當然要溫柔咁對女仔，所以如果你太粗暴咁捽リナ醬，佢唔單止會出聲鬧你（「好痛呀」、「放手！」），更會開始討厭你！如果情況持續，佢仲直頭會唔理你添！相反，如果你撫摸得當，佢對你嘅好感度就會上升，到時啦喎…嘿嘿嘿嘿嘿…

「喂！來來去去都係嗰幾句，咪好悶囉！」唔使驚！因為リナ醬內置已經有100句對白，將來仲可以透過電話下載來增至最多500句，絕對絕對係與時並進！我已經能夠預料有咩情人節版、聖誕節版諸如此類的DLC……
http://youtu.be/oYFvJPincLE
縱然喺介紹影片入面內村康一將リナ醬形容為自己老婆，但佢亦都好冇私(?)咁決定將リナ醬量產化。目前正在日本版Kickstarter 「Makuake」集資，目標係收集50萬日元(約3.3萬港元)，但截至今日已經超額認購至160萬Yen。如果你都有興趣，最平只要2萬Yen (約1300港元)就可以擁有一個「痛すぽ」。除咗リナ醬，仲有「奈月詩穂」和「神月しおん」兩個角色任君選擇，買哂三個都只係3365港元，都唔夠你買條Pandora！你諗下喎，買條Pandora比條港女可能連手仔都未有得摸，但使落呢到就有3條女任你揸喎！邊樣抵啲啦你話！