雖然我成日話日本女子偶像團體不論外部定內部競爭都非常激烈，所以好多成員都情願單飛轉型，但對於尋找入行機會嘅素人女仔黎講，加入女團其實依然係相對上最容易嘅選項。所以每當著名女團招募新成員時，往往都吸引到大量女仔報名。好似女團「METAMUSE (前稱 ZOC)」早年招募新成員，就吸引到超過3000人報名，而最終佢哋只係從中揀咗一位新人入團，而佢就係今晚要介紹呢位「鎮目のどか」！究竟佢又有咩咁特別呢？

10月先啱啱滿18歲嘅「鎮目のどか」係於2021年5月，即係佢未夠16歲時參加「METAMUSE (當時仲叫ZOC)」嘅選秀，並從3000人中脫穎而出成為唯一一位被錄取嘅新成員。團體成員兼「共犯者 (即係共同製作人)」、有份挑選新成員嘅「大森靖子」事後向媒體高度讚揚「鎮目のどか」係一個「與別不同嘅女孩」，所以先會選中佢。

而「鎮目のどか」早前接受訪問時，就提到雖然自己鍾意音樂，甚至幼稚園時已經會自己作歌作詞，小學時又有學過唱歌，但以前只係因為朋友介紹先去聽偶像歌曲，直到佢自己發現「ZOC」嘅存在先真正「入坑」，並慢慢產生要成為其中一員嘅想法。

而隨住年紀漸長，「鎮目のどか」亦唔再限於偶像活動，從今年夏天開始佢就先後為《Friday》及《週刊Playboy》拍攝寫真。論身材佢就唔算係有料架啦，但164cm高挑身材，再加上非常可愛嘅臉蛋，依然吸引到唔少目光。希望未來佢嘅偶像事業同寫真事業都可以同步發展啦！

IG：nodoka__shizume