講起「杉本有美」，比夠資深嘅讀者可能會記得六年前，MenClub曾遠赴日本訪問當時啱啱成為人妻嘅佢。但自從嗰次訪問完之後，佢似乎就慢慢從日本演藝圈中淡出，唔好話寫真，就連戲劇、綜藝嘅演出都少之又少。直到近日，佢先事隔七年再次為《週刊Playboy》拍攝寫真。究竟中間呢段時間佢做咗啲咩？七年後嘅佢又係點嘅樣？

話說「杉本有美」於2016年宣佈與細自己4歲嘅圈外白領結婚，去到2017年尾與經理人公司合約完結後就冇再簽新公司，美其名係成為「自由藝人」，但實際上就應該係專心經營家庭，事關呢段時間佢除咗客串成名作《炎神戰隊》嘅十週年劇場版之外，就幾乎冇其他演出作品。可幸…I mean，可惜嘅係，佢嘅婚姻只係維持咗短短三年就於2019年中結束，而「杉本有美」亦靜悄悄地於舞台劇界重新開始演藝工作。

直到近日，「杉本有美」先再次為《週刊Playboy》拍攝自結婚以來，七年黎首次水著寫真。據佢接受訪問時提到，其實七年前佢已經對被稱為「寫真女優」感到抗拒，覺得外界不認識真正嘅自己，亦解釋咗點解後來即使復出亦只係去演舞台劇。不過因為疫情影響，近年入場睇舞台劇嘅人數大減，而佢為咗吸引大家再次入場，所以決定復出拍寫真，希望大家能夠重新關注佢。另外佢亦特別提到，今次拍攝之前佢冇刻意減肥鍛鍊，而係希望「讓人看到老了的我，最真實的我」。但從結果而言，佢似乎只係證實咗自己天生麗質，冇Keep都一樣咁正——佢老公究竟係點解捨得同佢離婚嘅呢？

IG：sugimotoyumi_official