遊戲《人中之龍》系列嘅每一部作品中，都包含好多小遊戲，而其中最深得男玩家心嘅，當然就係去搵陪酒孃摸下手仔同酒杯底。而系列最新作《人中之龍7外傳英雄無名》中出現嘅「阿優」，其扮演者「清流 あゆ」於現實生活中原來都係個著名陪酒孃，最近佢仲進軍埋寫真界，睇黎就係要迷到更多男人啦！

官方資料為26歲嘅「清流あゆ」，原本係於大阪北新地工作嘅陪酒孃，據佢嘅自我簡介，佢仲曾經係「業界最多鋪頭嘅集團中，顧客數、指名數全國第一」嘅頭牌小姐，不過近來已經引退。而佢第一次進入大眾目光，就係去年參加《人中之龍7外傳》嘅真人陪酒孃選拔，雖然最終未能奪冠，但仍然成功進入遊戲，並憑住自然不做作嘅演出以及出色嘅身材外貌而深得男玩家歡心。

或者係因為睇到市場反應，所以「清流 あゆ」去年12月就正式加入寫真界，推出首隻寫真DVD，今年3月再接再勵推出第二隻，近來仲為《週刊Playboy》拍攝寫真，發展得相當順利。大家或者都可以期待佢未來嘅其他作品啦。

IG：ayu_seseragi