有人話香港啲男人唔夠「男人」，係因為我哋唔使服兵役，太過嬌生慣養喎。計我話呢句說話真係錯得交關－－係咪嬌生慣養我就唔知，但講起當兵香港男仔絕對係經驗豐富－－一個唔該我哋係由13、4歲知道咩係女人開始就已經做緊兵，做咗十九幾廿年個膊頭都仲係花都冇粒！所以我哋係好明白啲軍中男子嗰顆寂寞的心！

咁夜闌人靜覺得空虛覺得寂寞覺得凍嘅時候，又可以搵啲咩人黎撫慰我哋呢顆乾到裂嘅「當兵的心」？根據Kpopstarz，以下呢五位女團成員就係韓國軍人嘅最愛！

第五位：太妍 《少女時代》 得票6.2%

近期推出個人專輯嘅太妍乃係《少女時代》嘅隊長兼主唱。07年出道時仲係一個18歲嘅小妹妹，8年過去已經成為26歲嘅女人。值得留意嘅軍人們通常都鍾意啲「妹妹」級嘅女團成員，但26歲嘅太妍已經算係「姐姐」級嘅偶像，但仍然深受歡迎，都算係異類啦！

第四位：草娥 《AOA》 得票6.7%

近年當紅女團《AOA》嘅主唱，一頭金色短髮相當易認。話說《AOA》呢隊女子組合初初係以「女子樂隊」形象出道，但到上年嘅《Miniskirt》就轉型為性感舞團。其中身材嬌小得黎又性感嘅草娥就受到唔少關注。近來仲登上多個綜藝節目，人氣頗高！

值得一提嘅係佢曾經參加過JYP以及SM(韓國兩大經理人公司，其中參加過SM的選拔15次)嘅選拔但都落選，最後去到FNC先得到機會。

第三位：惠利 《Girl's Day》得票6.8%

女子團體《Girl's Day》成員。初出道時的型像是梳馬尾嘅乖乖女，近來剪短頭髮之後就多咗兩分性感爽朗，兩分甜美可愛。上年出演綜藝節目《真正的男人(文青按，本來是一班男藝人體驗不同軍中生涯的節目，後來出咗個女版)》因為不做作而且豪邁嘅作風引起一陣熱潮，所屬組合Girl's Day嘅官網更因為太多人瀏覽而被癱瘓。

第二位：Hani 《EXID》得票7.8%

你未必有留意Kpop，但你好可能有睇過呢條「盤骨舞」嘅片。片中人乃係《EXID》組合嘅成員Hani，喺有片嘅情況下相信大家都唔需要我解釋佢究竟有幾性感，但其實佢仲係一個會棟高腳坐嘅「真漢子」。或者就係呢種反差魅力令佢成為當兵男士嘅第二最愛。

第一位：雪炫 《AOA》得票14.3%

被譽為「秀智接班人(秀智飯唔好打頭)」嘅雪炫今年只係得20歲，但就已經係當紅嘅韓國女偶像，唔單出演電影、廣告代言，早排仲登上時事版－－話說韓國SK Telecom整咗好多個雪炫嘅1:1人１形紙板放喺不同分店門口做宣傳，結果接連被盜，最後SK Telecom要以櫥窗貼紙取代。可想而知佢有幾咁受歡迎！之於受歡迎嘅原因係咩？大家都係男人，都知有陣我哋其實好膚淺架啦……