女神結婚回顧佐佐木希性感寫真

文：MenClub 魏文青　　
POSTED ON 10 Apr 2017

黎到呢個年齡，唔單止每逢假期都有人求婚(早排清明我都見到有人求…)，就連我哋J…追開嘅女神們都一一封盤。早日就日本報紙指女神佐佐木希即將會同拍拖兩年嘅男藝人渡部建拉埋天窗，睇怕以後都唔多會有性感演出。一齊黎睇返佢以前有幾正先！

據《產經體育》報導，佐佐木希同渡部建已經分別通知各自嘅代言公司有關結婚嘅事，但就未正式註冊。兩日由2015年被指拍拖，期間一直有八卦新聞流出。例如有指今年年頭佐佐木希就賣咗自己間屋搬去同男方同居，又為咗有「藝能界美食家」之稱嘅男方去料理教室學煮餸。而佐佐木希嘅事務所亦一直冇否認有關傳聞。

至於能夠追到女神嘅人又係邊個？渡部建今年42歲，係一個搞笑藝人，但因為好鍾意美食所以就有「美食家」之稱。據說佢一開始就係以自己嘅美食經驗，每晚為女神建議美食，到後來就兩個人一齊去食，食下食下就食埋女神。而又睇佢個樣就知佢唔係靚仔，明顯真係憑內涵擄獲女神芳心。所以話呢個世界唔一定係「Your face your fate」嘅！你哋都要加油呀！