1. The Alchemist, 英國倫敦

位於倫敦市中心，地標「Gherkin(正名為 30 St Mary Axe)」旁邊。Jurgen形容其內部裝修充滿現代感，提供大量由Mojito到自家研發等不同款式的雞尾酒，更有開班授徒，餐廳仲好好食添！

2. Bar Raval，多倫多

名字來自西班牙巴塞羅那舊城著名嘅酒吧區「El Raval」，同樣地以西班牙小食「Tapas」為主，故提供嘅雞尾酒亦配合小食嘅味道而以苦艾酒(又名威末酒，Vermouth)同雪利酒(Sherry)為主。值得一提嘅係仲提供低酒精雞尾酒，就算唔飲得都可以去湊下熱鬧啦！

3. Dante, 紐約

1915年開立，至今過百年歷史嘅酒吧，歷年來吸引如Bob Dylan、Al Pacino、海明威、Robert Mapplethorpe等人光顧。其Negroni特別有名，好賣到預先整好再用水龍頭斟出黎。

4. Untitled Supper Club, 芝加哥

吧內一星期有五日會舉行Live Show，內部間隔非常別致，甚有「柳暗花明又一村」之意。但最吸引嘅或者係佢嘅「配套」：隔離就係由Frank Munk主理嘅米芝蓮星級餐廳Bib Gourmand，附近亦有香檳吧、威士忌吧等。

5. Beaufort Bar, 倫敦

再次回到倫敦，位於Savoy Hotel中嘅Beaufort Bar以其藝術品裝飾而聞名，連本Menu都堪稱藝術品，配合提供嘅20種雞尾酒訴說Savoy Hotel嘅故事。

6. Blackwell Rum Bar, 內格里爾

你第一個問題一定係「內格里爾喺邊到黎？」，答案係加勒比海國家牙買加嘅度假勝地。而Blackwell Rum Bar就係處於當地The Caves Hotel之內，再睇埋張圖，好顧名思義啦？之於個賣點？都好明顯啦下話？

7. Gianni Bar, 洛杉磯

今年先開業，位於NoMad 酒店之內。由於酒店原址係意大利銀行，「Gianni」呢個名其實就係該銀行嘅創辦人。賣點？一字記之曰：靚！

8. Gold on 27，杜拜

位於著名嘅「帆船酒店」27樓，賣點非常切合成個杜拜，就係奢華。就算唔睇啲金閃閃嘅檯檯櫈櫈，啲雞尾酒竟然會用上番紅花、松露、羊奶芝士，鵝肝等名貴食材，非常豪氣。

9. Djapa Bar，香港

位於灣仔利東街，內部裝份揉合傳統日本藝術同色彩班爛嘅巴西圖畫，除咗有巴西風味嘅雞味酒，仲有超過300種日本威士忌同清酒。

10. Dogma，安特惠普

比利時安特惠普最著名嘅酒吧，內部裝飾非常有復古時代感。 而吧檯主理人Didier Van den Broeck曾獲得多個獎項，以個人風格重製傳統雞尾酒，亦有特色創意。

Maxim