當你年紀去到咁上下，你就會發現同班兄弟出去食飯，好多時都係食大牌檔。一方面當然係因為我哋唔去諗有咩新嘢食，另一方面亦都係因為我哋啲女朋友、老婆平時唔陪我哋食大牌檔、壓抑得太耐，唯有同班兄弟食飯先有機會。而女仔唔鍾意食大牌檔都係嗰幾個原因：啲嘢熱氣、地方唔靚、坐得唔舒服…Well，旺角依家就有間又靚又舒服嘅「大牌檔」啦！

位於旺角砵蘭街嘅「大牌檔 DPD」由前「明閣」米芝蓮二星團隊成員之一謝志偉師傅主理，主打價錢合理而親民的經典亞洲美食。招牌菜有Jacky 師傅精心研發、醬汁以 10 款秘製材料調成嘅「招牌乾炒牛河 」(HK$78) ；「大牌檔海南水晶雞」(HK$98) 用上斑蘭葉、泰國蒜頭仔、香茅等共六種新鮮香料，個飯就用雞湯蒸成；「DPD 冬陰公海鮮湯」(HK$128) 會先將鮮蝦煎香、烤焗先至熬製成湯，增加蝦嘅香氣，米線都係用爽滑吸湯嘅泰國米線，令客人有如置身泰國。

要說服女伴同你去食，個場本身靚唔靚都係重點之一。而大牌檔 DPD裝飾清爽明亮，比起大牌檔更加似係Cafe風格——講起Cafe，店內咖啡選用香港君悅酒店都用緊嘅意大利 Kimbo 咖啡原豆，仲有駐場專業咖啡師即席研磨及沖泡，非常「IG-able」，女仔又點會唔鍾意呢？

BTW，由於餐廳係由本港商人羅傑承所開，而羅生舊將，前港腳陳肇麒目前擔任品牌董事，所以有時喺鋪頭都會見到佢。據知餐廳亦準備喺晚市禁堂食令放寬後，推出每位HK$133嘅中式晚市三道菜套餐。133蚊食米芝蓮級數，抵食啦！

地址:旺角砵蘭街 244 號 B2-B4 號舖
電話:2827 8638
營業時間:星期一至日 7:30pm – 11:30pm