台灣便利店「全聯」以廣告及Facebook專頁發文搞笑有趣而聞名，堪稱台灣最「識玩」網絡行銷嘅品牌之一。近年全聯亦踏足飲食界，最新開設「全火鍋」今日先正式開門做生意，但去到10月頭嘅網上預訂已經爆哂，可見有幾受歡迎！

圖片：全火鍋 on Facebook

「全火鍋」位於台北大安區，國父紀念館站附近，門面以七千幾個燈泡裝飾，搶眼之餘現代感亦非常重，明顯係個打卡勝地。

店內採用一人一鍋制，總共五款湯底，包括「佛系素食鍋」、「麻辣鴨血鍋」、「蔬菜昆布鍋」、「桂丁土雞麻油鍋」及「台式風味石頭鍋」，每款都配有各不同肉類或海鮮以及麵食，最貴都只係399台幣 (約HK$105)。其中「麻辣鴨血鍋」嘅湯底係由知名大廚「聖凱師」調製；而點「蔬菜昆布鍋」嘅人客又會有一份來自米芝蓮星級餐廳「吉兆割烹壽司」嘅沾醬。

圖片：全火鍋 on Facebook

另外亦可以散叫有機菜、澳洲穀飼牛梅花、美國無骨牛小排等配料，都只係幾廿蚊港紙一碟。飲品方面有即場鮮榨果汁，以及多款紅白酒、威士忌及雞尾酒。

特別值得一提嘅係佢個菜單上嘅介紹都充滿「網絡梗」，提醒你間嘢係全聯開嘅。

圖片：全火鍋 on Facebook

既有全聯嘅號召力，亦有美食嘅支持，令「全火鍋」一公佈就成為台灣網民熱話，今日正式開幕，但網上預約去到10月頭都完全冇位。假若疫情過後大家有機會去台灣又想試下，就要提早預約定啦。