餵飽別人．照亮別人－大埔Manna

文：MenClub Mean娜　　圖：互聯網
POSTED ON 11 Sep 2015

嗎哪（Manna）喺希伯來原文嘅意思係「什麼」，基督教徒都知道，嗎哪（Manna）屬靈嘅意思係「生命的糧食」，人食咗，就可以得到飽足，直到永遠。飽足本來係人生活最基本嘅要求，但飽食嘅快樂非人必然，有人日日大魚大肉，不愁溫飽；但轉個街角，卻有人擔憂，今晚冇飯開，食唔飽，著唔暖，勞勞碌碌。可惜，講求公平嘅社會，實質並唔公平，好多弱勢社群都被人忽略，只能無助地等待別人主動打救。Manna老闆Leo，話希望自己可以為弱勢社群盡點力。



有別於觀塘近年愈開愈多嘅工廈餐廳，位於大埔汀角路嘅Manna，係區內少數嘅工廈餐廳，巴打們平時遊車河入鹿頸，出番嚟唔使再下下食大埔「群記清湯腩」、「新明發食家」、「陳漢記」等等，可以試試呢間開業約一星期，連「開飯網」都未有資料嘅工廈餐廳。


Leo早有好幾間餐廳，Manna所處位置，原本只係輔助用途，後來有感「既然有咁大地方，用得唔好嘥」，所以決定喺上址開設餐廳。


Manna表面係一間普通工廈餐廳，平時嘅客人都係附近工廈嘅打工仔或工貿大廈嘅年青IT人，亦有鄰近富亨邨同大元邨嘅居民同學生哥。事實上，Manna嘅存在有著更重大意義。身為基督徒嘅Leo，坦言以往歷許過好長嘅黑暗日子，試過吸毒、入黑社會、亂搞男女關係、畀人淋紅油等等……當時人生歷盡低潮，感到無助，後來得到別人幫助，重新振作，覺得要為社會出一分力。


Manna嘅營業時間由星期一至六早上8點至下午5點。點解唔做埋夜晚生意？ Leo話，一來工廈區夜晚好少人特登嚟食飯，二來希望餐廳喺晚上可以用作夜遊青年「基地」，玩吓Board game、吹吓水，總好過喺條街無所事事，終日打機蒲酒吧。


星期日，Manna會開放畀香港外籍家庭傭工，畀佢哋搞興趣班，例如教佢哋彈吓ukulele jam吓歌。 Leo話，香港有不少外籍家庭傭工都唔到公平待遇，喺打工家庭食埋啲餸頭餸尾，星期日只能夠喺公園流連集結，日曬雨淋。佢話：「可能好多人不滿外藉家庭傭工一到假日就『霸佔地方』，但將心比己，去到外地工作，連一個容納自己嘅地方都冇，其實係好悲傷嘅事情。假如坐公園草地嘅唔係『印傭』同『菲傭』，而係『鬼仔』同『鬼妹』，香港人又會唔會同樣嫌人哋阻住晒？可能調返轉，會變成類似赤柱、中上環嘅『特色』地方？」


Manna至尊漢堡 $98 漢堡扒份量十足，肉味濃郁而且非常Juicy，加上半溶嘅芝士及新鮮嘅蔬菜，惹味得來又夠Fresh。薯條亦炸得夠香脆，配上略帶辛辣嘅芥末醬，值得一試。

海陸空拼盤（帶子、牛扒、水牛城雞翼） $88 香濃嘅牛油帶子配搭軟稔鮮嫩嘅牛扒，再加上酸酸辣辣嘅水牛城雞翼，款式夠多又飽肚。

餐肉炒蛋菠蘿包配蕃茄濃湯貝殼粉（漢堡扒）$35 嫩滑嘅炒蛋夾在酥脆香甜嘅菠蘿包內，加上咸香味十足嘅餐肉，味道口感都充滿層次。蕃茄濃湯貝殼粉湯底濃郁，蕃茄味亦十分鮮甜，配上彈牙嘅貝殼粉，非常入味。

Manna肉醬熱狗皇配鮮果沙律 $40 肉醬熱狗上鋪上一層厚厚嘅熱溶芝士，加上滿滿嘅香辣肉醬，非常豐富。配上新鮮嘅水果沙律，亦夠晒健康。

香蕉朱古力雪糕吐司 $38 燒過嘅香蕉十分香甜，而吐司亦非常香脆，每一口都混和了朱古力雪糕及柔軟嘅忌廉，約埋女仔Share食就最Sweet！

Manna嗎哪地址︰大埔太平工業中心二座10A 電話︰5239 6872 營業時間︰星期一至星期六08︰00 - 17︰00