嚟到季尾時間，唔止頂級聯賽嘅球會要為來季前途打生打死，就算係次級聯賽都唔例外，特別係英冠球會，為咗升上英超一定出盡全力，事關英超一季嘅轉播費同其他經濟利益分分鐘係一間球會仔幾年嘅開支，真係食粥食飯靠呢舖。而隨住星期一紐卡素主場大炒普雷斯頓4-1後，佢同白禮頓就篤定一齊上英超，至於其他球會要爭第三個升班名額嘅話，首先要拎到升班附加賽資格先啦。

今季美冠絕對係白禮頓同紐卡素兩支球隊威晒，去到球季中後段已經放甩其他球隊，兩支球隊已經篤定升班，不過爭冠之路仲未完，因為白禮頓目前只係領先紐卡素一分，聯賽冠軍仍然未知鹿死誰手。白禮頓領隊曉頓就講到明希望以英冠冠軍升班，仲想下一季英超開咧戰就對「冠軍」熱刺。其實曉頓球員時代效力過熱刺12季，主觀願望梗係想熱刺可以後上奪冠。轉任領隊嘅曉頓可以話係白禮頓嘅球會英雄，帶領球會自1983年後首次重返頂級聯賽，可以話係球會高峰。另外值得一提嘅係如果下季英超領隊無執位的話，曉頓亦會成為來季英超唯一一位黑人領隊。

至於紐卡素升班基本上係意料中事，相反以佢哋人腳，竟然仲要落後白禮頓先係問題。紐卡素可以重返英超，除咗因為留低大部份上年隨球隊降班嘅原有球員之外，仲要多謝賓尼迪斯有勇氣「挑戰英冠」。老實講，上季初段仲教緊皇家馬德里，中途轉為幫紐卡素護級，之後仲同一齊落英冠，對賓帥黎講個反差都算幾大。而賓尼迪斯呢季成功為球隊去蕪存青，仲搵到馬特列治同杜韋加爾兩位新兵，成為紐卡素火力嘅保證。下季英超呢兩位球員絕對值得留意。

賓尼迪斯喺球季開始時曾經被質疑對英冠一無所知，未必可以帶領紐卡素有好成績。可能各位會覺得英冠明明係次一級聯賽，對教過英超西甲意甲嘅賓帥黎講會有幾難打？但其實英冠賽程比唔少頂級聯賽仲要密，加埋足總盃、聯賽盃賽事，絕對考驗領隊輪換球員功力。另外就算喺國際賽期，英冠都可能有比賽，如果你隊中咁「好彩」有球員係國腳，你就隨時要打少幾個。加上英冠球隊喺轉會窗完結後係仍然可以租借英超球隊青年軍嘅球員，所以球隊實力變化可以好大。雖然唔係頂級聯賽，不過教得掂都係另一種實力嚟。可惜嘅係即使球隊已經保證升班，但賓帥都無保證下季仍然會留隊，唔知會唔會令到紐卡素成為「升降機」啦。

李羅渣 (facebook page: https://www.facebook.com/leerogerfcpage/)

八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員

由懶到出汁變成泰拳愛好者

除咗足球最鍾意就係睇戲、睇書、飲兩杯

唔求發大達，最想成為有些少生活品味嘅偽文青。