【中港大戰】閉門緩刑兼罰款恆大執身彩

文：李羅渣　　圖：互聯網
POSTED ON 07 May 2017


中港矛盾近年越演越烈，點會燒唔到足球嗰疊？上個月25日廣州恆大嚟香港作客對東方龍獅嘅亞冠盃比賽，恆大球迷喺尾段舉起「殲英犬滅港毒」嘅標語，亞洲足協最後裁定廣州恆大違反紀律和道德守則第58及65條展示涉及國籍來源及政治意見的歧視性標語，被罰款22,500美元兼亞洲賽事主場閉門作賽兩場但緩刑兩年，係人都知足球界一向嚴打各式各樣歧視，特別係牽涉政治同種族，恆大今次罰得唔重真係要還神。

先前世界盃外圍賽香港主場對中國時，香港球迷就曾經噓國歌連累香港隊被罰款，好多朋友覺得亞州足協無料到。不過，唔係次次都咁鬆手，好似2014年3月J League球會浦和紅鑽有球迷喺看台掛起「Japanese Only」嘅橫額，最後被罰主場閉門作賽，係J League有史以來最嚴重處分，而浦和紅鑽就損失最少9900萬日元收入，J League更要求浦和紅鑽解散11個球迷組織，更警告如果紅鑽再犯就會直接降落J3，而浦和紅鑽自此便進行一系列反歧視行動，所以喺球場搞歧視行為，真係可大可小。

至於亞洲足協對恆大呢次判罰又係唔係合適，可以話罰係預咗，不過亞協又真係輕手嘅。首先恆大球迷紀律一向有問題，亞洲賽遇上日韓球隊時亦有做出零聲種族歧視行為，而更不堪係亞協決定調查今次事件時，廣州恆大官方竟然話呢啲球迷係非會員，唔代表恆大。一來球迷付出時間同金錢支持球隊，球隊有事第一時間竟然同球迷割席，堂堂一隊中國班霸咁無承擔已經相當無恥，而恆大更無好似浦和紅鑽咁做返相應行動去防止類似事件再發生，顯然恆大係默許球迷喺比賽期間做呢啲行為，所以亞協罰重啲其實唔過份。

呢次事件反而有個問題係幾值得討論，就係東方今次雖然係主場，但係氣勢上完全輸俾恆大，呢個無計嘅，一來中超球隊球迷又係當地人，歸屬感係香港球迷完全無得比，而且絕大多數香港球迷唔係見港隊先前有好表現先支持，就純粹為咗發洩對中國不滿先入場，關於球場文化更加係一竅不通。除咗本地波仍然有好多進步空間之外，本地球會本身都要花多啲時間去推廣打氣文化，唔係下次又有外隊嚟嘅時候，個主場靜到好似圖書館咁就真係失禮街坊。

李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。