【離隊？】阿仙奴首席射手山齊士想加盟拜仁！？

文：MenClub Mr.波特　　圖：互聯網
POSTED ON 12 May 2017


目前排名英超聯賽第5位嘅阿仙奴，喺餘下3輪賽事嘅情況下，與第4位嘅曼城相差3分，雖然「槍手」係著名嘅「爭四狂魔」，但係宜家嘅情況對於佢地黎講真係一啲都唔樂觀，佢地將會好大機會失去下季參加歐聯既機會。

而作為阿仙奴陣中嘅首席射手，山齊士今季一共為球隊喺各項賽事中攻入25球以及交出12次助攻，其中喺英超攻入20球，與車路士嘅迪亞高哥斯達並列射手榜第3位。

不過，有傳現年28歲嘅山齊士有意加盟德甲班霸拜仁慕尼黑，因為咁樣呢位智利射手將可以有更多機會贏得冠軍獎盃。另外，拜仁中場維達爾係山齊士同鄉兼好友，所以有機會嘅話佢都會想同對方一齊踢波。

如果拜仁真係對山齊士有興趣，都唔代表佢地可以輕鬆得到呢位射手，因為現時歐洲唔少豪門都對山齊士虎視眈眈，其中包括曼城、巴黎聖日耳門、車路士以及國際米蘭。

雖然拜仁今季再次輕鬆奪得德甲冠軍，但喺歐聯卻喺8強被攻力強大嘅皇馬淘汰，再睇番拜仁今季既入球分佈，基本上入球嘅都只係靠前鋒利雲杜夫斯基一個，佢喺德甲個人攻入28球，係拜仁陣中入球最多嘅球員，而球隊入球第2多嘅係洛賓，佢喺今季德甲攻入11球，兩者入球差距達17球。如果成功引入山齊士，拜仁將可以增加一個更加穩定嘅得分點，除左可以令利雲嘅入球壓力減少，拜仁戰術上將可以有更多嘅變化，同時山齊士嘅出現可以分散對方在地上對利雲嘅防守，咁樣拜仁嘅進攻將會變得更加立體同有威脅。

最終山齊士真係離隊嘅話，相信最頭痕嘅應該會係「教授」，因為佢要搵番位足夠強大嘅前鋒黎坐陣，但係阿仙奴無得打歐聯嘅話，相信作為大牌嘅前鋒都幾難會肯加入阿仙奴。究竟雲加今夏會有咩對策呢？大家拭目以待吧！