【你要識揀】踢波梗要搵番對岩自己嘅波boot

文：MenClub Mr.波特　　圖：互聯網
POSTED ON 15 May 2017


踢波，最緊要嘅就梗係對腳啦，咁你對腳就梗係要配番對適合嘅波Boot啦。但係一對波Boot點先叫好呢？

一對適合嘅波Boot，對每個人黎講都唔同，有人覺得對鞋越貼腳越好，又有人覺得要鬆少少先舒服。但無論點都好，想買一對岩自己嘅波Boot，就一定要帶你對腳現場試下。

不過，我Mr.波特都知大家未必有時間去試唔同嘅鞋，所以就等我去幫大家睇下兼試下，究竟現時市面上嘅波Boot有啲咩款，同佢地有無咩大分別。

Nike

Nike magistax onda ii ic


Nike mercurial victory vi dd


Nike hypervenom phelon ii dd


adidas

adidas messi 16.3 in


adidas copa 17.4 in


Mizuno

Mizuno monarcida fs in


Puma

Puma evospeed 5.5 it

Puma evopower 4.3 tricks it


上面嘅波Boot Mr.波特我都已經試過，但清一色都係覺得前腳掌太窄，但係如果要大啲嘅碼對鞋又會太長，令到唔夠貼腳。唯獨Mizuno嘅波Boot試著後係較為舒適，聽聞因為Mizuno係日本公司，所以佢地製造嘅波Boot都較為適合日洲人嘅腳型。而如果你追求較為有名嘅牌子，Nike的hypervenom phelon ii dd、adidas的messi 16.3 in以及Puma的evospeed 5.5 it都係較為舒服嘅選擇。


雖然以上嘅波Boot都係更加專業嘅選擇，但係講到街場嘅皇牌「波Boot」，又點少得「白飯魚」呢？

白飯魚對於一眾年輕嘅朋友可能會相對無咁熟悉，但係對於一眾90後或之前出世嘅朋友應該都有同感，就係著「白飯魚」踢街場，威力好似仲勁。無他嘅，因為「白飯魚」嘅鞋面係用帆布做，所以鞋身特別軟又貼腳，所以對球嘅觸感會特別強，著住佢無論你係控球又或者射門都會特別得心應手。不過講到佢最重要嘅特點，一個字「平」！相比起普普通通嘅大牌子波Boot要400幾－500幾蚊，一對「白飯魚」就只係廿幾三十蚊，可以講係抵到爛。

不過，由於「白飯魚」鞋身只係帆布，所以成日踢波嘅你好快就會踢爛一對，而且由於鞋底問題，所以唔可以喺草場踢波，如果唔係就會跣鬼死。另外，由於「白飯魚」鞋底較薄，所以對腳底嘅保護無咁好，腳要承受嘅壓力相對就大得多。


講到尾，每個人嘅要求都唔同，要搵到最岩你自己個對，睇怕都要你自己花啲時間，去試一試啦。