基本(Standard)

顧名意義，就係最基本嘅電單車形態，大部份都只係有最基本嘅配備，亦唔太會有花俏嘅外表。所以又稱為「Naked Bike」或者「Traditional Bike」。佢最大嘅賣點就係簡單，所以相對黎講耐用性比較高、油耗亦比較少，亦都因為易於改裝，所以可以衍生出大量改裝版本。另一個特色就係因為兩邊腳踏同離合器嘅位置適中，大約係位於腰部正對下，手把亦有一定高度，所以駕駛者嘅坐姿會比較自然。

巡航車(Cruiser)

個人認為最有型嘅電單車種類，最簡單直接嘅形容就係「Harley Davidson」，當然佢亦只係當中其中一個品牌。Cruiser可以再細分為「Chopper(前叉特別長)」、「Bobber(冇尾擋沙板」同「Baggers(加置儲物位置)」，設計上係以長程旅途為主，引擎扭力主要於低轉時產生，咁駕駛者就唔需要頻繁地轉波，揸起上黎就更加輕鬆。因為踏板較前，手把亦比較高，所以駕駛時兩腳要前伸，個人亦會自然地向後傾，即係坐到個大爺咁款。

跑車(Sports)

即係「劉德華喺《天若有情》揸嗰啲」，因為追求速度表現嘅原因，所以通常都有大馬力，操控性亦會比較好。為咗要減低風阻，會有大量車殼包住車身，亦會有各種各樣高科技協助爭取好成績(提提你請勿超速)，但相對地對於初學者黎講就比較難上手。因為要減風阻嘅關係，駕駛者會向前傾、甚至整個人「瞓」落架車到，而手把亦會相當低，踏板就會靠後。

Adventure Sports

又Adventure又Sports咁係咩呢？其實就即係電單車界嘅SUV。為咗方便啲鍾意上山下海，但又想要一個相對舒服旅途嘅駕駛者而設。坐姿同基本類似，但架車本身就有大馬力(攀山涉水用)同相對大嘅儲物空間。同時因為要長時間行走崎嶇路面，耐用性同操控性亦相當唔錯。

Dual Sports

同Adventure Sports一樣都係兼顧馬路與山路嘅選擇，但Dual Sports類別追求嘅唔係舒服，而係平同簡單。絕大部份都冇咩多餘嘅裝飾、儲物空間，馬力亦偏小。但因為相對較輕、靈活同易於維修，所以亦係一個好選擇。坐姿方面通常會比較直，目的為咗減低對駕駛者手腕嘅負擔以及減低轉彎速度，所以手把比較橫，腳踏位置適中。

休旅車(Touring Car)

可能係電單車家族中最「大份」嘅一員，適合跨國長途旅行之用。最主要嘅特點係有大量儲物空間、加大油缸，特大擋風玻璃等等。行走表現方面，主要都係以舒適為主，但因為車身多咗好多嘢，所以引擎馬力亦需要比較大，初學者就未必咁容易上到手啦。

當然，以上六種其實都係粗略嘅分類，每一類當中又可以細分好多唔同款式，有啲種類嘅界線到今時今日黎講都比較模糊(例如某啲Cruiser同Touring其實都幾難分)，仲未計千千萬萬嘅改裝車。所以呢篇只係一個好簡略嘅介紹！有機會先再同大家仔細介紹！

參考:Wikipedia、hiconsumption