加利夫巴利如被賣走，希望加盟摩連奴的曼聯

文：MenClub Mr.波特　　圖：互聯網
POSTED ON 18 May 2017


皇馬翼鋒加利夫巴利近日同球隊攤牌，直言如果今夏真係要被賣走，佢喜歡加盟曼聯多過加盟車路士。

雖然巴利並唔想離開馬德里，但如果皇馬決意要將他送離班拿貝球場，咁佢都係有自己想加盟嘅球隊。

其實喺去年10月，巴利先岩岩同皇馬續約，當時合同仲一簽簽到2022年，除稅後週薪達到25萬鎊，講真比我都唔想走啦。

不過由於傷患問題，巴利被皇馬領隊施丹質疑其作用同佢係球隊嘅未來，所以佢嘅位置已經被取代。

今季巴利一共為皇馬上陣左24場比賽，其中都係一啲賽季初嘅比賽，所以基本上皇馬今季能夠有咁好嘅成績，都唔係太關巴利事。相反，伊斯高同艾辛斯奧都令人印象深刻，令人開始忘記巴利嘅存在。

除此之外，皇馬亦有意喺今年夏天向車路士收購同巴利一樣係翼鋒嘅夏薩特，又或者係摩納哥嘅麥巴比，咁樣巴利嘅位置將會受到更加嚴重嘅挑戰。

據最新嘅消息指，巴利嘅經理人已經開始向一啲英超球隊兜售巴利，相信對佢有興趣嘅球隊紀對唔少。

另外，巴利亦已經同皇馬主席佩雷斯見面，兼且講左自己希望去幫摩連奴，令曼聯可以重返英超強隊之列，但令人估唔到嘅係，佢對於加盟今屆英超冠軍並無加盟曼聯咁大興趣。而重返熱刺則完全唔喺巴利嘅計劃當中，他對呢個想法一啲興趣都無。

查實簽下巴利對於曼聯黎講都好有幫助，因為佢地上季嘅入球基本上都係全靠「呂布」伊巴謙莫域一個，但係宜家嘅佢因傷休戰，下季會唔會重返曼聯都係未知之數。咁嘅情況下，領隊摩連奴一定要搵返粒星番黎，除左增加球隊的星味外，最緊要嘅就係加強球隊嘅入球能力。而巴利作為一名飛翼，擁有極高嘅速度以及盤球能力，再加上他嘅遠射又了得，絕對值得摩帥收歸旗下。