【正貨? 水貨?】普巴雖太貴但有用

文：李羅渣　　圖：互聯網
POSTED ON 21 May 2017


球季步入尾聲，球迷除咗緊張球隊成績，茶餘飯後都睇到唔少球迷討論吓今季轉會嘅球員表現如何，今日喺論壇睇到有球迷覺得今季以8900萬鎊由祖雲達斯「愛回家」曼聯嘅普巴係今季水貨之一。如果你記性好，都會記得小弟對普巴轉會曼聯相當有保留，一來身價太貴，二來佢離開曼聯後喺傳媒訪問多次對曼聯出言不遜，不過學任達華喺《PTU》話齋「著得套制服，就係自己人」，唔嚟都嚟咗，點都望佢生性啲，而普巴今季表現雖然仍有幾大進步空間，不過曼聯絕對無入錯貨。

無可否認普巴喺入球同助攻數字上同上季喺祖雲達斯時真係失色唔少，今季所有比賽加埋只得10個入球同4次助攻；但係供應上，普巴真係交足功課，今季聯賽上陣場數比上季少，但關鍵傳送就有55次比上季多一次，傳送成功率係85%，都係比上季多；攔截平均每場兩次，同上季差唔多。進攻上嘅貢獻付諸流水，其實唔完全係普巴責任，當然，普巴都有需要鍛練一下遠射能力，自朗尼退化後曼聯就少咗好多遠射入球，普巴好多時攞位又太盡，搞到變成曼聯「柱男」。

亦會有球迷話，普巴缺點無反映喺數字上面，當中最大爭議就係成日「妹下妹下」、死拎住個波搞到失波。普巴本身有一定速度同盤扭技術，係代替卡域克負責球隊攻守轉換嘅重要人物，而扭波嘅問題當然係合理批評，又好彩踏入2017年後呢個問題其實係改善咗。而摩連奴亦幫普巴搵到個好拍檔，就係靴里拉，有靴里拉幫手俺護同幫波，相信呢對組合以時間建立默契後應該可以大有作為。

8900萬鎊買普巴，當然唔同免費簽嘅伊巴一樣要求即食，普巴只係24歲，仍然前途無限，長遠嚟講，佢絕對係曼聯未來重要一員。除咗要放棄喺意甲得心應手嘅上腳踢法，更加要專注喺足球，有睇佢IG就知呢個法國潮童大把嘢玩，商業活動又多，比完賽唔休息捱夜睇NBA明星賽都夠膽死，希望佢好好利用自己天賦貢獻曼聯。另外普巴嘅爸爸上星期因病離世，希望普巴可以堅強面對。


李羅渣 (facebook page: https://www.facebook.com/leerogerfcpage/) 八十後、忠實曼聯球迷、唔忠實嘅愛華頓球迷、前網台節目主持、Menclub足球文章作家、演員由懶到出汁變成泰拳愛好者除咗足球最鍾意就係睇戲、睇書、飲兩杯唔求發大達，最想成為有些少生活品味嘅偽文青。