- SITE MAP
- |
- CONTACT US
- |
- ADVERTISING
- |
- PRIVACY
- |
- MOBILE
- |
- RSS
| |
碧咸(David Backham)呢位球員算係足球界入面，就算唔睇波嘅人都一定會識嘅一位。而如果要數足球壇最靚仔嘅球員，相信佢認第二，真係無人會敢認第一。不過呢位球星出色嘅地方又點只得個樣呢？ | |
| 現年42歲嘅碧咸，喺2013年5月嘅時候已經掛靴，而唔經唔覺原來都已經過左4年。離開左球場嘅碧咸，目前正多方發展，其中包括喺美職聯同一班投資者合資組成一支新球隊，而佢本人亦因外型討好，所以己經正式投身於荷里活電影之中，其中近期上映嘅《神劍亞瑟王》就可以睇到佢嘅身影。 | |
| |
| 雖然擁有殺死唔少女性嘅外型，但係碧咸亦可以令一眾男士睇到目定口呆，咁呢樣當然就係講緊佢嘅足球技術啦，而其中罰球同傳中球就係佢最為人所熟悉嘅絕技。 | |
| 講番碧咸嘅球員生涯先，1975年出世嘅佢10歲嘅時候就加入英格蘭本地嘅足球青訓，其後12歲嘅時候佢就轉到熱刺嘅青訓。直到1991年，碧咸先正式進入曼聯青訓，而就係咁佢就成為左曼聯歷史上著名的七小福之一。 | |
| 曼聯七小福，曾為球隊喺1992年贏到青年足總杯(Youth FA Cup)冠軍，所以佢地未來就慢慢成為紅魔鬼嘅骨幹成員。喺1992年9月23日，仲喺學徒身份17歲嘅碧咸喺聯賽盃迎來自己喺曼聯一隊嘅首場比賽，之後喺1993年1月終於正式同曼聯簽下第一份職業球員合同。 | |
| |
| 雖然簽下正式球員合同，但係碧咸都係無咁快可以加入曼聯一隊，佢先喺預備組繼績鍛鍊，而喺佢嘅助陣下，曼聯預備組成功喺1994年奪得預備組聯賽冠軍。雖然碧咸嘅實力已經慢慢得到肯定，但係領隊費格遜仍然希望可以再鍛鍊一下呢位年輕球員，所以喺1994-95球季將佢外借至英丙聯賽嘅普雷斯頓1個月，希望佢可以吸收下作為正選球員嘅經驗。而就喺普雷斯頓效力期間，碧咸一共上陣左5場比賽攻入2球，其中包括一記直接射入嘅角球。 | |
| 就喺回歸曼聯後，碧咸終於喺1994年4月2日迎來自己喺英超嘅首次上陣。1995-96球季，碧咸正式晉身成為球隊穩定嘅正選球員，作為中場嘅佢入球亦唔少，平均每季都可以射入10球左右。而其中相信大部份球迷都難以忘懷嘅半場笠射，就係喺1996-97球季揭幕戰上面對溫布頓時發生的。而正正係呢個笠射，令世界唔少人都開始認識呢位年輕帥氣嘅球員。 | |
| 不過，碧咸亦曾經出現年少衝動嘅時候，講緊嘅就係1998年世界盃同阿根廷嘅16強比賽，佢有一次被施蒙尼從後推跌後竟然蓄意踢跌對方，最終被球證即時紅牌驅逐離場。正因為碧咸呢次毫無意義嘅犯規，最終英格蘭喺12碼大戰中不敵對手出局，而英軍嘅球迷對於碧咸呢次不智嘅犯規非常不滿，甚至認為佢就係球隊出局嘅大罪人。 | |
| 雖然喺國家隊失利，但係碧咸喺之後一年就迎黎佢球員生涯嘅巔峰，因為曼聯除左喺本土連奪聯賽冠軍同足總盃冠軍之外，佢地喺歐聯決賽上，亦上演歷史性嘅反勝，憑住補時階段嘅兩個入球，曼聯成功反勝拜仁奪得歐聯冠軍，成為三冠王。值得一提嘅係，兩個補時階段嘅入球都係憑住角球入嘅，而開角球嘅正正就係碧咸。 | |
| |
| 就喺曼聯成為三冠王後，碧咸嘅名氣越發增加，再加上他嘅外型帥氣，形象又百變，所以經常成為傳媒嘅追訪對象。對於愛徒呢種情況，領隊費格遜開始有微言，而就係咁就埋左碧咸離隊嘅伏線了。2003年2月，曼聯喺足總盃被老對手阿仙奴淘汰，賽後喺曼聯更衣室，領隊費Sir極度憤怒，認為球隊出局係因為碧咸防守不力，對此碧咸亦反諷恩師費格遜，最終導致出現為人所認知的「飛boot事件」，而碧咸因為被球鞋飛中，導致眼角需要縫針。 | |
| |
| 碧咸同費Sir師徒關係最終亦因以上嘅事件決裂，「萬人迷」就喺2003年夏天以2450萬鎊轉會費離開效力12年嘅「紅魔鬼」，加盟西甲班霸皇家馬德里。喺曼聯效力期間，碧咸一共主要為球隊帶黎6次英超聯賽冠軍、1次歐聯冠軍及2次足總盃冠軍。 | |
| |
| 碧咸加入皇馬後，令這支「銀河艦隊」組成了足球歷史著名嘅「6條A」，而雖然碧咸一向著開7號球衣，但由於皇馬嘅7號球衣一直由球隊傳奇前鋒魯爾所擁有，所以碧咸只能選擇另一個號碼，最終佢選擇23號，據聞佢揀呢個號碼係因為「籃球之神」Michael Jordan係佢嘅偶像。碧咸加盟皇馬後，其影響力即時發揮出黎，就係佢第一日加盟，佢嘅23號波衫已經賣出8000件，比朗拿度同施丹加盟時賣出嘅波衫數量多出3-15倍，證明佢嘅受歡迎程度絕對係世界級的。 | |
| 可惜嘅係，雖然擁有「6條A」嘅皇馬當時牌面陣容非常強勁，但係實際上佢地嘅戰績一啲都唔理想，所以碧咸喺2007年決定離開皇馬轉投美職聯嘅洛杉磯銀河。而就喺決定離隊後，碧咸喺當季聯賽最後階段成功發揮出星級實力，多次以出色嘅助攻為皇馬帶黎勝利，最終皇馬成功奪得西甲聯賽冠軍，而呢個亦係碧咸效力皇馬4年期間奪得嘅唯一一個主要冠軍。 | |
| |
| 轉投美職後，碧咸一直飽受傷患困擾，但係佢嘅專業態度卻令人印象深刻，佢曾經為了要上陣比賽，決定施打3支止痛針，即使喺比賽期間藥效下降導致佢越黎越疼痛，但係都無阻佢繼績堅持比賽，就係咁碧咸成功令唔少本身對佢起質疑嘅人都開始改觀。 | |
| 效力銀河6年期間，碧咸曾兩次外借至意甲嘅AC米蘭，期間佢嘅表現中距中規，但係比賽態度絕對一流。最終，佢喺銀河一共拎到3次總冠軍，以及3次西岸第一。2013年1月，碧咸決定離開銀河轉投法甲班霸巴黎聖日耳門，佢同球隊簽左一份5個月嘅短期合同，而佢亦決定喺呢一季結束後就正式掛靴。最終，聖日耳門呢一季成功奪得法甲冠軍，碧咸成功以一個聯賽冠軍為佢嘅球員生涯作結。相信唔少人對於碧咸生涯最後一場比賽嘅感人時刻記憶猶新。 | |
| 碧咸嘅足球生涯雖然唔係達到球王級，但係佢對足球界嘅影響力就絕對係歷史級別，而佢嘅「七旋斬」就更加係獨步球壇嘅絕技之一。唔好講咁多啦，一齊黎回味下碧咸嘅精彩罰球同埋傳中球啦！ | |