【唔好呀！】保方直言來季將99.9%是他生涯最後一季！

文：MenClub Mr.波特　　圖：互聯網
POSTED ON 14 Jun 2017


「保方保方保住後方」黎句野相信唔少球迷都一定聽講過，但好快呢句金句可能就無機會再講啦，因為保方就快要掛靴啦。你無聽錯，球壇長青樹祖雲達斯門將保方日前表示，來季將99.9%是他生涯最後一個球季，咁即係完成下季賽事之後呢位傳奇就會正式掛靴離開球壇啦。

現年39歲嘅保方曾經表示，出戰來年世界盃之後，佢就會正式退出意大利國家隊，而當時佢完全無提過球會層面嘅事。點知突然之間，呢位意大利一代門將竟表示自己會喺來季賽季完結後退役，咁即係世界盃將會係佢生涯最後一項賽事。

保方接受訪問時表示：「我將99.9%喺下季完結後退役。我地今季曾殺入歐聯決賽，並好有機會完成一個偉大嘅賽季(三冠王)，但宜家真係係時候講夠啦，真係夠啦。」

「我曾經同球隊主席Andrea Agnell說過，就係如果我地能夠奪得歐聯冠軍，咁我就會再打一年去為球隊嘗試贏下世界冠軍球會盃以及其他獎盃。」

聽到保方上面所講嘅野，真係好令人心嗡，因為佢喺球員生涯入面三次助祖記殺入歐聯決賽，但就係贏唔到冠軍，只能夠成為「千年老二」。

保方雖然已經39歲，但係佢嘅狀態其實卻一直保持喺世界級水平，今季成功助球隊再次衛冕意甲聯賽同埋意大利盃冠軍，歐聯亦三年內第二次殺入決賽，其中保方統領嘅後防絕對係居功自偉。

保方自從2001年夏天加入祖雲達斯後，一共為球隊上陣左622場比賽，期間一共為球隊帶黎8次意甲聯賽冠軍、1次意乙冠軍、3次意大利盃冠軍、5次意大利超級盃冠軍。雖然無贏過歐洲賽冠軍，但係保方絕對係意大利球壇入面嘅傳奇，佢退役個日必定會引起世界球壇轟動！