麻雀雖小 GREENMOXIE拖架屋

文：MenClub 魏文青　　
POSTED ON 02 Jul 2017

就憑近年外國不停湧現各種改裝車屋、貨櫃屋或者簡便房屋，就知道土地問題都真係唔係香港獨有。而有時呢啲設計又真係幾人希望有一日可以引入香港，等後生仔都有個負擔得起又靚仔嘅安樂蝸。例如由貨車拖架改建而成嘅「Greenmoxie」咁，就真係好令人心動。

講到明係用貨車拖架改建，Greenmoxie嘅設計原意由架貨櫃拖去某個地點，放低，就可以入住。所以佢本身就自帶電力(太陽能發電)、食用水(雨水收集加過濾)、空調等等生活設備。但單單係咁並不足以令佢成為一個吸引嘅簡便家居，實際上最吸引嘅係佢嘅設計，首先門口玄關位置有一塊可以收起嘅地台，如果要長時間離開、或者要搬運時可以摺起，唔係就可以當係小陽台。推門而入就係起居間、直行到尾就係廁所、浴室同廚房位，至於睡房就喺閣樓。

整體用上非常多木材，感覺就比較溫暖舒適。而且入面大至雪櫃、座廁、石油氣爐，小至起居室嘅音響以及長櫈上面嘅攬枕都係價錢包埋。總面積340平方尺，售價係65000美金，即係50萬港紙左右，絕對係Affordable架——唔計笪地嘅話。