【暗示？明示？】良月月巴真係要離開曼聯了？

文：MenClub Mr.波特　　圖：互聯網
POSTED ON 15 Jun 2017


曼聯岩岩一季雖然喺聯賽只能夠拎到第6位，但係佢地就成功奪得三項錦標：慈善盾、聯賽盃及歐霸盃，其中憑住歐霸盃紅魔鬼成功獲得來季歐聯分組賽參賽資格，所以佢地都算係過左一個唔錯嘅賽季。

對於來季將繼績多線發展，曼聯今夏必須大肆擴軍先有機會再次挑戰多個錦標，而以紅魔目前最弱嘅一環，相信就係前鋒線啦。曼聯今季入波最多嘅球員係「呂布」伊巴謙莫域，但係佢因為受傷將需要休養至2018年先可以復出，所以曼聯決定今夏唔同佢續約，咁樣就更加令曼聯嘅鋒線飽受更大壓力。

如果無左伊巴，曼聯嘅鋒線就只係得番朗尼、馬斯亞同拉舒福特叫做可以派得上場，但其中朗尼狀態已經大幅下滑，表現已經不可同日而語，更何況一直盛傳佢今夏會離隊，所以最近先一直傳莫拉達會加盟曼聯。

對於唔少魔迷黎講，都覺得「良月月巴」已經無咩用，希望球隊可以將佢送走，而最新嘅資訊顯示，「良月月巴」可能真係會走啦！邊度得知呢個消息？睇下曼聯官方Twitter帳號就會一清二楚。

喺曼聯官方Twitter號最上方的圖片，大家宜家睇到嘅係普巴、靴里拉同埋連加特，但係其實喺一個月前朗尼都喺呢條Banner上面架，只不過如今佢已經被消失。作為球隊隊長，朗尼咁樣被消失，真係好難唔覺得奇怪，所以這似乎就係暗示朗尼即將離開曼聯。

朗尼較早前一直指自己正在考慮未來嘅去向，留隊唔係無可能，但係如今離隊嘅可能性更大，佢有可能加盟英超中下游嘅球隊，但係相信佢無可能拎得番目前喺曼聯拎緊嘅人工，如果唔係佢就真係可以考慮加盟中超，但係佢自己就要重新適應一個新環境，同埋踢一個水平低得多嘅聯賽啦。