【最新消息】曼城即將出手收購奧巴美揚？！

文：MenClub Mr.波特　　圖：互聯網
POSTED ON 20 Jun 2017


近日洲際國家盃已經展開，而呢項賽事令到唔少球迷都分左心，但其實轉會市場上各支球隊已經開始越黎越多動作，其中多蒙特射手奧巴美揚係今年夏天歐洲豪門嘅搶手貨之一，其中巴黎聖日耳門、曼聯、利物浦以及曼城都希望可以簽得呢位加蓬射手。

而最新嘅消息指，雖然曼城陣中已經擁有好似阿古路嘅頂級前鋒，但佢地亦都已經準備就緒，將會正式向多蒙特提出收購奧巴美揚嘅轉會方案。當然，哥迪奧拿亦知道呢位德甲嘅當紅射手身價絕對唔平，所以預計佢地將會為佢開出6100萬鎊嘅轉會費，希望可以打動多蒙特。

上季，奧巴美揚一共為多蒙特上陣51場比賽，期間一共攻入42球，最終助球隊獲得德甲第3名，成功獲得下季歐聯分組賽嘅參賽資格。

雖然曼城背後擁有足夠嘅銀彈，但係佢地都必定要同其他豪門爭奪奧巴美揚呢位當紅射手。而聖日耳門方面最新嘅消息指已經放棄收購奧巴美揚，所以目前英超將會係佢最大機會登陸嘅聯賽。

而目前最有可能挑戰曼城嘅可能就係利物浦，因為利物浦領隊高普以往曾執教多蒙特多年，因此對奧巴美揚亦相當熟悉，相信佢絕對有能力開放呢位前鋒嘅所有潛能，以及進一步加強球隊嘅攻擊力。

如果曼城最終真係成功羅致奧巴美揚，咁樣本身攻力已經好足嘅曼城將會變得更強大，上季喺英超入波最多嘅曼城球員係阿古路，佢一共入左20球，之後就要數到史達寧同捷西斯嘅7球，所以加入奧巴美揚呢位速度極高嘅球員配以阿古路呢個鋒線組合，相信絕對會令曼城帶黎更多嘅入球。