【草地王者】35歲「費天王」8奪溫網冠軍！

文：MenClub Mr.波特　　圖：互聯網
POSTED ON 18 Jul 2017


前世界一哥「費天王」費達拿尋日再次捧起四大滿貫之一嘅溫布頓網球錦標賽冠軍，實在令人感觸良多，因為正當唔少人都認為「費天王」差唔多到球員嘅晚年時，佢今年竟然連奪兩項大滿貫錦標(較早前佢已經奪得澳洲網球公開賽冠軍)，令人相當意外。

今年費達拿再一次殺入佢最擅長嘅草地賽(溫網)決賽，而由於主要對手梅利同佐高域都係8強意外出局，所以今年「費天王」嘅對手係世界排名第6位嘅克羅地亞球手施歷(Cilic)。對手作為世界第6嘅球手，實力理應都唔會太差。不過，面對今年狀態大勇嘅費達拿，再加上施歷有傷痛影響，最終費達拿以直落3盤6：3、6：1、6：4擊敗對手。相隔5年後，費達拿再一次拎到溫網冠軍，並且係全程不失一盤下完美封王。

今次奪冠係費達拿球員生涯第8個溫網冠軍，亦都係佢第19個大滿貫冠軍。值得一提嘅係，費達拿今次奪冠後，正式超越著名球手森柏斯，成為溫網奪冠次數第一人。

費達拿今次能夠再次溫網冠軍，可以話完全係部署成功，因為佢放棄左早前舉行自己唔太擅長嘅泥地賽－法國網球公開賽，全力備戰溫網，所以無論喺體力定係草地適應上都有更充分嘅準備，所以能夠有咁出色嘅發揮。

唔好睇費達拿今年一舉奪得兩項大滿貫錦標，其實佢係今年之前已經有5年時間無拎過大滿貫，同時間佢亦失去世界排名第一嘅寶座，喺呢段時間入面呢位曾經嘅一哥亦都懷疑自己，認為自己開始走下坡，唔再屬於世界頂級球手之列。不過，估唔到5年之後佢竟然可以重拾佳態越戰越勇，真係諗到無諗過。以咁嘅狀態，呢位「老將」隨時可以喺未來重奪世界一哥寶座，再次書寫自己嘅歷史！