2017姚基金慈善賽NBA球員名單公佈！

文：MenClub Mr.波特　　圖：互聯網
POSTED ON 26 Jul 2017


作為NBA球迷，今年可能就有一個你最期待嘅夏天，因為姚基金今年首度黎到香港舉辦「2017姚基金慈善賽」，因為有住火箭著名中國中鋒姚明嘅關係，部份NBA球星將受邀以美國職業籃球Nike星銳隊嘅身份黎到香港進行慈善賽，唔使飛到美國都可以睇到呢班球星絕對係機會難得！

今次「2017姚基金慈善賽」將會喺7月30日香港紅館舉行，而最令球迷期待將會參戰嘅NBA球員陣容亦終於出爐，除左之前已經率先被透露嘅騎士「神經刀」J.R. Smith外，其餘參賽嘅球員包括：勇士總冠軍成員之一Patrick McCaw、帝王主力中鋒Willie Cauley Stein、公牛Bobby Portis、傳奇球員Gary Payton嘅兒子公鹿Gary Payton II、76人Justin Anderson、金塊Trey Lyles以及前火箭球員Kyle Wiltjer。就咁睇陣容唔算好華麗，但係可以睇到兩位總冠軍成員(Smtih同McCaw)同真係機會難得，其中後者更加有望成為勇士未來計劃嘅成員之一。

除左NBA球星外，今次賽事亦邀請左中國CBA嘅球星，其中包括王哲林、趙繼偉、孟鐸、趙睿、方碩、阿不都沙拉木．阿不都熱西提、王子瑞、范子銘、沈梓捷、易立、孫銘徽、原帥、劉志軒、常林及張兆旭，另外賽事亦成功邀請到三位NBA級別嘅中國球員黎到現場，佢地分別係易建聯、周琦以及丁彥雨航。而香港方面，南華球員惠龍兒同羅意庭則會加入中國隊同Nike星銳隊進行比試。

今年姚基金慈善賽嘅主題係「投向未来，Yao動全城」，希望透過一連串嘅慈善活動，為貧困地區嘅學生創造更多機會同平台去展現自己，並學習感受體育精神同團體合作。更重要嘅是，喺參與體育運動嘅過程入面增强他們對未來嘅信心，走向更美好嘅人生「賽場」。