Megabots其實一直都有於Youtube更新佢哋嘅進度，而呢部「MK.III」亦早於5月嘅「Maker Faire 2017」率先登場。不過近日Megabots先至公開一段展示影片，炫耀一下呢部「Eagle Prime」嘅性能。Eagle Prime重12噸，最高有16尺，造價250萬美金。動力由兩台430匹V8引擎提供，傳送至坦克用履帶之上。武器方面左手有兩支漆彈「炮」，射出黎嘅漆彈可以打穿油筒；右手就係一隻巨爪，既可以用黎衝撞，亦可以扯開對手嘅裝甲，據說仲可以換裝成電鋸、電鑽同火槍。駕駛艙有兩個座位，亦需要兩個駕駛員同時操作。
