前曼聯「瀟灑哥」貝碧托夫加盟印超聯！

文：MenClub 波特先生　　圖：互聯網
POSTED ON 25 Aug 2017

如果要數近10多年曼聯嘅正選前鋒，朗尼必定係最令人印象深刻的一位，因為佢效力時間最耐。咁唔計朗尼，喺雲尼斯杜萊同沙夏之後，曼聯嘅正前鋒係邊個呢？無錯啦，就係人稱「瀟灑哥」嘅保加利亞人貝碧托夫啦。而已經離開曼聯一段時間嘅佢，近日就正式加盟印度超級聯賽，並有機會同曼聯嘅前隊友喺新球隊再遇。

現年36歲嘅貝碧托夫2008年加入曼聯，當時佢就係取代離隊嘅沙夏。貝碧並唔係一位速度型嘅球員，喺場上甚至有時候會覺得佢太慢，但係佢卻係擁有極高腳下技術嘅球員，往往可以以令人想像唔到嘅方法入球或助攻。

不過2012年貝碧選擇加盟富咸，就係咁佢喺紅魔鬼嘅生涯就此完結。而離開紅魔鬼之後，貝碧除左曾效力富咸之外，仲效力過法甲嘅摩納哥同希臘聯賽嘅PAOK，其中效力PAOK嘅時候，佢一共上陣25場攻入5球。不過，上季貝碧並無參加任何聯賽，所以佢已經超過1年無進行比賽，狀態成疑。

今次，貝碧加盟嘅係印度超級聯賽嘅球隊Kerala Blasters，雙方簽約一年，據報指佢嘅年薪約為90萬鎊。而貝碧亦唔需要擔心印度人生路不熟，因為佢嘅前曼聯隊友布朗喺佢加盟之前，亦都已經早佢一步加入Kerala Blasters，所以貝碧將有熟人照應一下。