【歐錦賽2017】熱火控衛帶領斯洛文尼亞歷史性奪冠！

文：MenClub 波特先生　　圖：互聯網
POSTED ON 18 Sep 2017

今年夏天，各位籃球迷可能覺得相對以往無咁悶，因為雖然無得睇NBA，但係就多左一個全新嘅3人籃球聯賽BIG3，另外兩年舉行一次嘅歐洲籃球錦標賽亦喺今夏舉行。最終，今屆賽事有點歷史交替，因為傳統勁旅西班牙被拒決賽門外，而兩支決賽球隊則係近4屆賽事挑戰金牌的。

今屆歐錦賽，決賽兩支隊伍分別係斯洛文尼亞同塞爾維亞，其中塞爾維亞對上一次殺入賽事決賽已經係2009年嘅事，最終佢地亦只能夠奪得銀牌，而斯洛文尼亞則更加係國家隊歷史上首次殺入決賽的，因此無論邊支球隊奪冠都會創造歷史的。

其實今次決賽嘅兩支球隊，陣中都擁有NBA球星，共中好似塞爾維亞就有活塞「巨神兵」Boban Marjanovic同今夏加入帝王嘅Bogdan Bogdanovic；斯洛文尼亞方面則有熱火正選控衛Goran Dragic同NBA未來選秀大熱Luka Doncic，所以其實雙方嘅實力都係非常接近的。

而喺比賽入面，雙方亦各不相讓，互有領先，但係斯洛文尼亞喺賽事尾段嘅把握力更出色，最終以93：85擊敗塞爾維亞，奪得今屆賽事嘅金牌。今仗斯洛文尼亞表現最好嘅球員係Dragic，呢位控衛全場取得35分7籃板3助攻，而Klemen Prepelic亦都為球隊添上21分。塞爾維亞方面， Bogdanovic為球隊取得22分5助攻4籃板，Macvan則添上18分。

奪冠後，斯洛文尼亞球員喺更衣室嘅慶祝情況：

而另一邊廂，西班牙喺季軍戰以93：85擊敗俄羅斯奪得銅牌，其中Pau Gasol及Marc Gasol分別取得26分10籃板及25分4籃板。

歐洲籃球錦標賽歷史其實相當悠久，賽事喺1935年創舉，直到1947年起每兩年舉辦一次，然後黎到今年再次改制，賽事此後將會每4年舉辦一次，並會成為奧運及籃球世界盃嘅資格賽。

歐錦賽近幾屆都由西班牙統治，但係歷史上奪得冠軍次數最多嘅球隊並唔係西班牙，西班牙只係奪得過3屆冠軍，排名歷史第4位，而排名第1位嘅係已經解體嘅前蘇聯，佢地曾經奪得14次冠軍，比第2位嘅南斯拉夫(8次奪軍)多贏6次冠軍！