之前我哋講過PlayStation趁住20周年，將會出一套六款嘅扭蛋，由PS2至PS4都有，唯獨欠缺初代灰機。但查實PS冇遺忘到佢，仲好戲在後頭，原來係留番嚟同《變形金剛》嚟次crossover，推出可以變成PS1嘅柯柏文，完成品官圖仲已經有得睇，唔止有埋手掣，就連機背端子都整得幾仔細喎，仲要送多張真嘅記憶卡添，衰鬼。

PS1文哥係由TAKARA TOMY ART推出，預計明年2月正式發售，定價7,500（約$535）。有呢個crossover，係因為今年除咗係PlayStation 20周年，亦都係《變形金剛》30周年，真係雙重喜慶喎，所以文哥先會唔變貨櫃車而變PS1。其實再之前發布可以變16-BIT世嘉5代嘅麥加登，都就快會喺今個月尾賣街，如果TAKARA TOMY ART喺今年完之前再整多隻變超任嘅老變出嚟就正喇。

重溫：16-BIT世嘉5代麥加登