【究竟係咩心態？】攝腳等於摧毀人一生！

文：MenClub 波特先生　　圖：互聯網
POSTED ON 30 Jan 2018

近日，一段香港地下籃球聯賽嘅影片喺網上面瘋傳，主要係因為呢場比賽入面，有一位防守球員襯對方起跳射三分嘅時候，竟然睇準對方落地嘅位置蓄意攝腳，令對方腳踝嚴重扭傷，而諷刺嘅係呢位攝腳嘅球員竟然係一名救護員！

攝腳就係襯對方起跳落地嘅時候，刻意將自己隻腳放喺下面等你踩落去，咁樣你將會好容易出現扭傷，呢個舉動如果你有睇NBA都絕對見過，其中相信用呢招最出名嘅就係馬刺名宿Bruce Bowen以及勇士中鋒Zaza Pachulia，而Bowen更加因此被唔少球星認為係NBA最陰濕同茅嘅球員之一。


當嗰位球員出動攝腳呢一招，明顯就係要對方受傷，可想而知呢一招嘅殺傷力有幾強。相信如果有試過拗柴嘅朋友，正常自己行路拗一拗都已經好痛，但如果你係起跳加上自己成個人嘅重量而落地拗柴，你估你嘅腳踝究竟有幾傷？咁樣由高落下扭傷腳踝，入面嘅韌帶所承受嘅壓力絕對極大，輕則單條韌帶撕裂，導致腳踝外側腫脹瘀青；重則多條韌帶撕裂，腳踝內外側與背側都出現瘀青；再嚴重嘅話，韌帶全部斷晒甚至骨折，需要進行手術治療。

對於輕微嘅扭傷，最快都要1個月時間先可以復元，仲要復元後受傷人士都未必可以回復100％狀態，但係受傷得重嘅話，輕則以後跳得無咁高，重則可能心理上令佢發唔到力跳起，可想而知如果更嚴重嘅扭傷究竟會帶黎幾大嘅傷害！

其實，好似香港呢啲地下聯賽，大家都係尋求打比賽嘅快感，就算被對手擊敗，都唔應該選擇去傷害對方身體，雖然有關聯賽已經取消左該名球員嘅參賽資格，但係相信呢位球員將唔會咁易被放過，佢好可能以後無機會參加任何比賽，甚至以後落街場被人認出嘅話佢就大獲了。