【終於成軍！】「萬人迷」碧咸美職聯球隊正式亮相！

文：MenClub 波特先生　　圖：互聯網
POSTED ON 30 Jan 2018


(完整版)

「萬人迷」碧咸自從2013年離開巴黎聖日耳門後，便正式結束自己嘅球員生涯。而喺掛靴後，「咸爺」可以話向多方面發展，其中包括拍荷里活電影、拍廣告、籌備足球隊等等。而黎到今日，屬於碧咸嘅球隊終於面世啦！

此前已經有指碧咸一直喺美國籌備緊佢嘅球隊，而今日佢處於邁阿密嘅球隊亦正式獲得美職聯方面准許加入，成為聯賽第25支隊伍。其實早喺當年到洛杉磯銀河踢波嘅時候，碧咸已經獲得美職聯方面首肯，比佢喺退役後成立屬於佢嘅球隊。

據報導指，預計碧咸嘅球隊將會喺2020年正式參加美職聯嘅賽事，而接下來球隊將會喺未來興建屬於佢地嘅主場館，該球館將會擁有25000個座位，造價約2.25億美元。不過，球隊嘅名、隊徽、顏色及正式亮相日期則暫時仲未公佈。

作為球隊老闆，碧咸承諾球隊將會成為美職聯嘅最佳球隊，並會喺未來盡力引入世界級嘅球員。

碧咸作為曼聯嘅傳奇球員，年輕時憑住一腳中場笠射而廣為球迷認識，其後其俊朗嘅外表成功迷倒一眾少女，因此成為世界最受關注嘅足球員之一。喺球場上，「七旋斬」係佢嘅絕招，佢精準嘅傳送及罰球亦做就唔少經典鏡頭。如今成為班主嘅佢，唔知又可唔可以打造一支為世人所認識嘅球隊呢？