【無情拒絕】做阿仙奴領隊？特朗普Say No！

文：MenClub 波特先生　　圖：互聯網
POSTED ON 01 Feb 2018

阿仙奴自從2003-04球季以全季不敗奪得英超冠軍之後，10幾年黎就再無拎過1次啦。其後，阿仙奴更一度只係每季為爭聯賽第4位而努力，直到上季佢地更20年黎首次無緣參加歐聯賽事。對於呢個情況，相信唔少廠迷都歸咎於領隊雲加，認為佢真係係時候退落黎，否則球隊唔會有未來。

咁究竟68歲嘅雲加如果真係退落黎，邊一個會係適合嘅人選呢？美國「狂人」總統特朗普又有無得諗呢？

近日，英國著名主持人Piers Morgan成功邀請到特朗普接受訪問，作為阿仙奴嘅球迷，Morgan喺訪問當中直接邀請特朗普做阿仙奴領隊。

Morgan表示：「我認為你能夠建立一支防守出色，並保持攻擊哲學嘅球隊，更重要嘅是，你會不惜一切去贏得冠軍。」

不過對於Morgan嘅提議，特朗普並無太大嘅與趣，因為佢並唔係阿仙奴嘅球迷，唯獨佢嘅兒子曾被拍到著起阿仙奴嘅波衫，所以估計佢先係槍手嘅球迷。有趣嘅係，特朗普拒絕做阿仙奴領隊後，更直言佢有一位朋友係曼聯嘅老闆，對此Morgan感到有點尷尬。


最後，Morgan為特朗普送上一件印有特朗著名字嘅45號阿仙奴球衣，代表佢係美國嘅第45任總統。不過，就喺握手接過呢件波衫後，特朗普隨手就將佢掉出鏡頭外，明顯對呢份禮物完全不放在眼內。